Read dhopadhola Zabuli 69 Bible Online

Zabuli 69 - dhopadhola bible

Zabuli 69

¹Bothan, Awi Were, kole pi otundo kiri i ŋutan.

²Amunyere i cwodho, kam'ongoye lowo m'oridhere; adonjo i pi maluth, aka mikula ouman.

³Alacere gi ywak paran; aka dwondan raman. Waŋan ocore, gi kuro Were paran.

⁴Joma jodakana m'ongoye atoŋa, jothoth kalo ye wiyan, jomathoth jomito reyan, jomonjan gi misegey. Onyo gima an akikwalo, am'anoculi?

⁵Awi Were, iŋeyo reco paran; gimarac m'atieko timo k'opanere ruwaŋin.

⁶Weyi jono ma joketho geno i in jokiri jowosewere ro an, Awi Rwoth, Were pa lwak jolweny. Weyi jono ma jorangin jokiri jowobedi i wickwot ro an, Awi Were pa Isiraili.

⁷Kole obedo ro in m'omiyo iyetan, wickwot no oumo waŋan.

⁸Alokere ri wutmera jakicar, japath ri wot mama.

⁹ Kole mar ri ot perin liel i an paka mac, aka yet m'iyetin podho kwoŋan.

¹⁰K'amwolo adundo paran gi riyo kec, joyetan timo ameno.

¹¹K'aloko kutiya ruk paran, alokere gir'awaca pajo.

¹²Abedo gir'awaca pa jono ma jobedo i waŋkac, aka jomero jocwogo wer kwoŋan.

¹³To ri an, kwayo paran rin, Awi Rwoth, i hongo ma ripo, Awi Were, i mar perin makiwire m'oasere dwokan. Gi kony perin ma genere

¹⁴bothan akir'amunyere i cwodho; gwokan kwoŋ jokwor paran, gi pi maluth.

¹⁵Weyi mikula wokiri wouman, kosa akir'amunyere i pendi pi, kosa bur wouman.

¹⁶Dwokan, Awi Rwoth, kole mar perin makiwire ber; gi ŋono perin madwoŋ, wire ran.

¹⁷Ikir'ipan waŋin ri ŋeca perin; kole anitie i kidamba, kwakere dwokan.

¹⁸Core cegin kodan, bothan, gonyan kwoŋ jokwor paran.

¹⁹Iŋeyo yet paran, wickwot paran gi paka ibwonan; jokwor paran je iŋeyo.

²⁰Yet otieko turo adundo paran, aka onyo angoye gi geno. Adwaro wor, t'akinwaŋo; kodi jom'odiy cunyan t'akinwaŋo moro.

²¹Jomiyan kwir ma neki ni cemo, aka ri riyo pi paran, jomiyan vini mawac amadha.

²²Weyi meza pajo manitie ruwaŋ jo wolokere bwo; weyi kalima pajo ma cowirok wolokere gi ciko.

²³Weyi waŋ jo wolokere macol ma jokinyal neno; aka pier jo wokirin hongo je.

²⁴Konji woko keme perin kwoŋ jo, aka nge perin maliel paka mac wolaci jo.

²⁵Weyi kambi pajo wobedi kam'ojwangere, aka wongoye ŋata wobedi i wemin pajo.

²⁶Kole jomiyo litho ri jono m'itieko rwadho piny, aka ŋat'itieko miyo litho jomedo cando.

²⁷Medi rijo candirok i wi candirok; ikir'iboth jo.

²⁸Weyi nyingi jo worey woko i kitawo pa ji makwo; weyi wokiri wondiki nyingi jo kanyacel gi ji maber.

²⁹To acandere aka anitie i litho; weyi both perin, Awi Were, wokwonga an.

³⁰Alapako nyingi Were gi wer; alatuco dwoŋ pere gi foyo.

³¹Me lakisangala Rwoth loyo cowirok ma mirikwa kosa thwon, manitie gi tunge gi par tiende.

³²Weyi jom'odiy jowoneni to josangala; win ma wirango Rwoth, weyi cuny win wodwoki.

³³Kole Rwoth winjo jocandi, aka wiye kiwil gi ji pere ma jonitie i twec.

³⁴Weyi polo gi piny wopak go, nam gi kisi gimoro ma jowothi'ye.

³⁵Kole Were labotho Zayon to gero kendo tindin madongo ma Yuda, to ŋecin pere jobedo kenyo to joloko apajo.

³⁶Nyithindho pa ŋecin pere jolalunjo, aka jono ma jomaro nyingi go jolabed'iye.