Read dhopadhola Zabuli 72 Bible Online

Zabuli 72 - dhopadhola bible

Zabuli 72

¹Miy kere tiro perin, Awi Were, gi timo gim'otire ri wod pa kere.

²Weyi go wothum banja ri ji perin m'otire, gi ri jocandi perin gi tiro.

³Weyi gote wokel bero ri ji, gi tendere i gim'otire.

⁴Weyi kere wothum banja ri jocandi, wobothi ji ma bukony, to ŋinyo woko jadic.

⁵Weyi kere wokwo ka waŋceŋ liel gi ka dwe liel, i luse je!

⁶Weyi kere wobedi paka koth i ndelin, paka koth ma dhieko piny.

⁷I hongo pere weyi wotim gim'otire, to siem bedo, cuka dwe owey liel.

⁸ Weyi kere wodhum wok i nam tundo i nam, gi wok i malawa tundo i tum ma piny.

⁹Weyi jokwor pere jowokule piny ruwaŋe, aka jokwor pere jowonaŋ fukefuke.

¹⁰Weyi kerin ma Tarsis gi ma kigodin, jowomiy go mic, weyi kerin ma Seba gi Seba jowokeli mic.

¹¹Kerin je jolakule piny ruwaŋe, nonin je jolatic rigo.

¹²Kole kere botho jocandi ma jolwoŋo go, jocandi gi ŋat'ongoye gi jakony.

¹³Go mako wor gi ŋata nyap gi jacandi, aka botho kwo pa ŋata bu gimoro.

¹⁴Iy'adica g'akaka go botho kwo pajo, aka remo pajo lithi rigo.

¹⁵Kere woyindira, womiy go Zahabu ma Seba. Wokway rigo noknok, silwany pa Were wobedi kwoŋe noknok!

¹⁶Weyi cemo womore i ndelin, weyi tendere wopoŋ gi cemo weyi olemo mere wobedi paka Lebanon; aka weyi ji jowopoŋ i tindin madongo paka lum doy.

¹⁷Weyi nyingi kere woyindira cil gi cil, ŋeyirok pere womedere paka waŋceŋ! Weyi ji jowonwaŋ silwany pa kere, nonin je jowolwoŋ go ni jasilwany!

¹⁸Silwany wobedi ri Rwoth, Were pa Isiraili, go ma won kende timo gir'aura.

¹⁹Silwany wobedi ri nyingi go madwoŋ cil gi cil; weyi dwoŋ pere wopoŋ i piny gibe! Ameno, Ameno!

²⁰Kwayo pa Daudi, wod Yese, ogik ka.