Read dhopadhola Zabuli 77 Bible Online

Zabuli 77 - dhopadhola bible

Zabuli 77

¹Agoyo ndur ri Were, agoyo ndur, ni go wonyali winjan.

²I hongo ma teko paran arango Rwoth; wor gipi cingan oyare ma k'ojony i kwayo; cunyan okwero kwe.

³Aparo kwoŋ Rwoth to aomo cunyan; k'akwayo nyaliŋliŋ to cunyan podho.

⁴Iŋat'imiyan bedo waŋan wor gipi; acandere m'akinyal luwo.

⁵Aparo kwoŋ hongo macon, apoyo oro macene.

⁶Abedo wor i paro maluth; akwayo nyaliŋliŋ t'arango cunyan; aka me a gim'apenjo cunyan:

⁷“Rwoth okwer wan kicutho, go k'osangala gi wan kendo?

⁸Mar pere makiwire ma cil gi cil orumo? Cikirok pere otundo i gike ma hongo je?

⁹Were onyo wiye owil gi timo ŋono? Onyo nge omiyo go cego woko wor ma cunye ri ji pere?”

¹⁰To awaco ni, “Obedo rem paran ni cingi Jamalo swa maracuc owire.”

¹¹Alapoyo tim pa Rwoth; ey, alapoyo gir'aura perin macon.

¹²Alaparo kwoŋ tic perin je, t'aparo kwoŋ tim perin ma meni.

¹³Royo perin, Awi Were leŋ. Were mene madwoŋ pa Were mawan?

¹⁴Ibedo Were ma timo gir'aura, m'otieko nyutho meni pere i dier ji.

¹⁵Iŋat'ibotho ji perin gi cingin ma meni, wot Yakobo gi Yozefu.

¹⁶Munyo pi onenin, Awi Were, munyo pi onenin, lworo omako, ey, pendi nam okirin.

¹⁷Pondeponde to oyo koth; pondeponde omwoc; to lithkoth ywore thenge je.

¹⁸Mor ma mwoc koth perin, oyido nitie iy'asur, lithkoth perin olero piny; piny okirin to yengere.

¹⁹Royo perin oluwo i nam, ger perin i pi madwoŋ; kucel masembo perin k'onenere.

²⁰Iŋat'ileko ji perin paka mwendi gi cingi Musa kodi Aron.