Read dhopadhola Zabuli 78 Bible Online

Zabuli 78 - dhopadhola bible

Zabuli 78

¹Cik ithi win a ji paran, ri fonji paran ciki ithi win ri wac ma dhokan.

²Abino yawo dhokan iy'ageca, abino tuco gima luwere ma colo wok con,

³gigipiny ma watieko winjo aka waŋeyo, ma kwarere mawan jotieko waco riwan.

⁴Wak'opan jo kwoŋ nyithindho mawan, to wabino tuco ri luse m'obin yuwaŋe, tim madwoŋ pa Rwoth, gi meni pere, gi gir'aura m'otieko timo.

⁵Go owodho or ri Joisiraili, nyikway Yakobo. Go owodho or ri kwarere mawan, fonjo nyithindho pajo cik,

⁶ŋey luse ma yuwaŋe jowonyal ŋeyo, gi nyithindho ma fodi k'onywol, aka jowodongi to jowaco ri nyithindho pajo,

⁷ŋey jowonyal ketho geno pajo i Were, aka wiy jo wokiri wowil gi tic pa Were, to jowomaki or pere;

⁸aka ŋey jokiri jowocal gi kwarere pajo, ji ma wiy gin tek gi luse ma jogwenyirok, luse ma adundo pajo oyido k'oridhere, ma cuny gin oyido k'ogeno Were.

⁹Joefrayim ma jotiŋo aserin g'atum abor, jowire aŋey i ndelo ma lweny.

¹⁰Jok'okuro cikirok pajo gi Were; to jokwero woro cik pere.

¹¹Wiy jo owil gi gima go oyido otieko timo, gi gir'aura m'oyido otieko nyutho jo.

¹²I waŋ kwarere pajo, otimo gir'aura, i piny ma Misir, i ndelin ma Zowan.

¹³Were obaro nam to miyo joluwo i iye, to miyo pi cungo paka gim'odhure.

¹⁴Odieceŋ otelo jo gi pondeponde, aka wor je gi lero ma mac.

¹⁵Obaro telin m'oyawere i thim, to miyo jo pi amadha m'oromo paŋini m'owok i lutho.

¹⁶Were omiyo pi ma mol otula i tele, to miyo pi bayirok piny paka malawa.

¹⁷Kucel jomedere timo reco kwoŋe, gwenyirok kwoŋ Jamalo swa i thim.

¹⁸Jotemo Were iy'adundo pajo ka jopenjo cemo ma jomito.

¹⁹Joluwere kwoŋ Were, ka jopenjo ni, “Were nyalo poko cemo i thim?

²⁰Makada nende ogoyo tele to pi bayere woko, aka pi ma mol mwomere, to go bende nyalo poko mugat, kosa nyalo poko riŋo ri ji pere?”

²¹Riameno, munyo Rwoth owinjo, opoŋ gi keme; to mac gaŋere kwoŋ Yakobo, nge pere ogaŋere kwoŋ Isiraili;

²²rupiri oyido jongoye gi yeyo i Were, aka jok'ogeno kwoŋ meni pere ma both.

²³Kucel ooro pondeponde malo, to yawo thigin ma i polo;

²⁴aka go ocwe piny kwoŋ jo mana acama, to miyo jo cemo wok i polo.

²⁵Dhano ocamo mugat pa jomalaika; odhiro rijo cemo kidhur.

²⁶Go omiyo koyo ma yuwok ceŋ kudho i polo, aka gi meni pere oguro woko koyo ma yupiny;

²⁷go ocwe riŋo kwoŋ jo paka fukefuke, winyin ma jobwombi gin paka kwoyo ma name;

²⁸omiyo jo podho i dier kambi pajo, thoko kabedo pajo je.

²⁹Jocemo to joyeŋ maber, kole go omiyo jo gima joyenyo.

³⁰To mafodi jok'oyeŋ gi gima jomito, mafodi cemo oyido nitie i dhok jo,

³¹nge pa Were oliel kwoŋ jo, to neko woko jomatek kwoŋ jo, to rwadho piny cwo m'oyer i Isiraili.

³²Makada nende gino otimere fodi jotimo reco; makada otimo gir'aura, jok'oyeyo.

³³Ameno go oloko kwo pajo macek paka ywe, gi oro pajo teko.

³⁴Munyo oneko jomegi kwoŋ jo, jom'odoŋ jorango go; joŋuto reco to jorango Were gi cuny jo je.

³⁵Jopoyo ni Were oyido obedo tele pajo, Were Madwoŋ Maloyo, jaboth pajo.

³⁶To jowondo go gi dhok jo; jowondo go gi lew jo.

³⁷Cuny jo k'oridhere kwoŋe; jok'okuro cikirok pere.

³⁸Kucel, cunye Were oramo ri ji pere, ocwako reco pajo, aka k'oreyo jo. Go ojuko nge pere aka k'oywoyo kwoŋ ji pere.

³⁹Go opoyo ni oyido jobedo nyaka ji, koyo ma kadho aka doko kidwoki kendo.

⁴⁰Didi ma jogwenyere kwoŋe i thim aka joramo cunye i thim!

⁴¹Jotemo go dikweth, to jokwinyo Ŋataleŋ pa Isiraili.

⁴²Jok'opoyo meni pere, kosa ndelo ma go oboth'iye jo kwoŋ jakwor,

⁴³munyo okelo ranyuth pere i Misir, gi gir'aura pere i ndelin ma Zowan.

⁴⁴Owiro malawin pajo lokere remo, ŋey jokiri jowonyal madho pi mere ma mol.

⁴⁵ Go odhiro tome lwaŋino m'oreyo jo, g'ogwale, m'oreyo jo.

⁴⁶ Omiyo cemo pajo ri kilajaja, gi olemo ma tic pajo ri bonyo

⁴⁷Oreyo woko olemo pajo gi pe, gi musikamol pajo gi ŋico.

⁴⁸Oneko dhok pajo gi pe, gi mwendi pajo gi lithkoth.

⁴⁹Ogonyo kwoŋ jo nge pere ma gero, keme, candirok, gi kidamba, kitipa pa jomalaika m'oreyo jo.

⁵⁰Otimo ger ri nge pere; k'ogwoko jo kwoŋ tho, to omiyo kwo pajo ri two nundu, (yamo m'atieko jo.)

⁵¹Oneko woko nyithindho makayo ma Misir, nywol pajo marapena ma meni pajo i wema pa Ham.

⁵²Nyaka to telo ji pere paka rombo, to leko jo i thim paka mwendi.

⁵³Oleko m'ongoye teko, ŋey nyaka, lworo wokiri womaki jo, to nam oloyo kor jokwor pajo.

⁵⁴Aka okelo jo i lowo pere maleŋ, i got ma cinge maracuc oyido omako.

⁵⁵Oriemo woko nonin ruwaŋ jo, ofudo rijo lim pajo, to ketho nonin pa Isiraili i wemin pajo.

⁵⁶Kucel jotemo to jogwenyere, kwoŋ Were ma Jamalo swa, aka jok'okuro or pere.

⁵⁷Jowire woko kwoŋe aka jotimo gibanirok paka kwarere pajo, jominere paka asere m'ominere.

⁵⁸Jomiyo go nge gi kitipa pa jom'oyeyo pajo manyakafir, jomiyo go bedo gi nyeko gi cal pajo.

⁵⁹Munyo Were owinjo, opoŋ gi keme, to kwero Isiraili kicutho.

⁶⁰Oweyo kabedo pere i Silo, wema m'oyido go obed'iye i dier ji pere.

⁶¹Oyeyo jokwor mawan mako Sanduku ma Cikirok, ranyuth ma meni pere gi dwoŋ.

⁶²Omiyo ji pere ri abor, to olo keme pere kwoŋ alunja pere.

⁶³Mac omwonyo yac pajo, to nyir pajo jongoye gi wer ma nywomirok.

⁶⁴Jocway ri Were i wi migam pajo jotho g'abor, to mon pajo k'oyey jo ywak.

⁶⁵Nyaka to Rwoth cew pa oyido nindo paka jamaker ma koko gi sangala ro vini.

⁶⁶Okedho jakwor pere i kikengila; okedho jo i wickwot ma cil gi cil.

⁶⁷Rwoth okwero nyikway Yozefu; go k'oyero nono pa Efrayim;

⁶⁸Go oyero nono pa Yuda ayin, gi Zayon ma go omaro.

⁶⁹Kenyo go oger'iye kabedo pere, maleŋ ma cal peco pere i polo, oloko go ma kiyengere paka piny ma go otieko nwaŋo cil gi cil.

⁷⁰Oyero ŋeca pere Daudi; to kwanyo go i kwath rombo;

⁷¹Kam'oyido go kway'iye mwendi, to loko go jakwath pa ji pere Yakobo, pa Isiraili, alunja pere.

⁷²Daudi okwayo jo gi cunye maber, to leko jo gi ndijo ma cinge.