Read dhopadhola Zabuli 80 Bible Online

Zabuli 80 - dhopadhola bible

Zabuli 80

¹Cik ithin, Awi Jakwath pa Isiraili, winji wan, jatel pa mwendi perin. Ibedo i kom perin ma dhum i wi cwec ma jobwombi gin,

²nyuthere ri nonin pa Efrayim, Benyamin, gi Manase. Nyuthi wan meni perin, biye bongi wan!

³Dwoki wan, Awi Were! Nyuthi wan wor perin, ŋey wanyal both!

⁴Inomaki nge gi kwayo pa ji perin kiri keraŋo, Awi Rwoth, Were pa lwak jolweny?

⁵Imiyo rem olokere cemo mawan, wamadho kikopo ma pigi waŋ wan.

⁶Iloko wan ginyero ri ji, aka jokwor mawan jonyero wan.

⁷Dwoki wan, Were pa lwak jolweny! Nyuthi wan wor perin, ŋey wanyal both!

⁸Ikelo yath vini wok i Misir, iriemo woko nonin megi t'ipidho go i lowo pajo.

⁹Icwado rigo kabedo madongo, fuc mere odonjo piny, to yare i lowo gipi.

¹⁰Oumo gote gi tipo mere, aka jange oumo woko yen sida ma jogaŋere.

¹¹Jange oyare kiri i nam, tundo kiri i malawa Yufrete.

¹²To raŋo onyo ituro woko cel mere, ŋey ŋata luwo je nyalo kwalo nyingi vini mere?

¹³Mbije madudi jonyono piny, aka ogwaŋe madudi jocamo.

¹⁴Wire bongi wan, Were ma jameni je! Ŋiy piny wok i polo, akinen, dew kwoŋ yath vini me!

¹⁵Biye both yath vini ma in won ipidho me, vini ma nyaka ay m'imiyo dongo matek!

¹⁶Jokwor mawan jowaŋo gi mac aka jotoŋo piny, ŋiy jo gi nge aka irey woko jo.

¹⁷Kuri aka kwonga ji m'itieko yero, nono m'iloko matek.

¹⁸Wakibino wire kwoŋin kendo, kur wan makwo, aka wabino pakin.

¹⁹Dwoki wan, Rwoth Were pa lwak jolweny! Nyuthi wan wor perin, ŋey wanyal bothi!