Read dhopadhola Zabuli 84 Bible Online

Zabuli 84 - dhopadhola bible

Zabuli 84

¹Amito swa bedo i Ot perin, Rwoth pa lwak jolweny.

²Amito swa bedo kenyo. Ayenyo swa bedo i Ot pa Rwoth. Cunyan gi delkwoŋan wero gi kisangala ri Were makwo.

³Kiri obico je jogeto od gin koro, aka winyin jogeto peco pajo. Jonywolo nyithindhi gin cegin gi migam perin, Rwoth pa lwak jolweny, Kere paran aka Were paran.

⁴Josilwany a jono ma jobedo i Ot perin, aka jowero rin wer ma pak noknok.

⁵Josilwany a jono ma jonwaŋo meni pajo wok bongin, aka jomito swa kidho i got Zayon lamin.

⁶Paka joluwo gi i milelo Baka, lokere waŋ pi, koth ma cwir poŋo kidiwin.

⁷Jolokere matek ka jokadho, jobino neno Were pa werin i got Zayon.

⁸Awi Rwoth, Were pa lwak jolweny, winji kwayo paran, ciki ithin, Were pa Yakobo.

⁹Miy kere mawan silwany, Awi Were, kere m'itieko yero.

¹⁰Ndelo acel i Ot perin, ber loyo gana kaman je. Them acungi i waŋkac ma Ot pa Were paran, loyo bedo i peco pa jokidakana.

¹¹Rwoth Were obedo waŋceŋ kodi kwot, miyo wan silwany, wor gi dwoŋ. Go kithwon jono ma jotimo gim'otire, gimaber.

¹²Awi Rwoth pa lwak jolweny, josilwany a jono ma jogeno i in!