Read dhopadhola Zabuli 86 Bible Online

Zabuli 86 - dhopadhola bible

Zabuli 86

¹Winjan Rwoth, aka dwokan, kole ajacandi aka abu gimoro.

²Bothan kwoŋ tho, kole aluwo cik perin, bothan, kole abedo ŋeca perin aka ageno i in.

³Maki kodan wor, Awi Rwoth, kole akwayin ndelo gipi.

⁴Rwoth, miy ŋeca perin kisangala, kole atiŋo adundo paran malo rin.

⁵Iber riwan aka icwako, ipoŋ gi mar makiwire ri jono ma jokwayin.

⁶Awi Rwoth, cik ithin ri kwayo paran, winji ywak paran ri kony.

⁷Alwoŋin i ndelo ma teko, kwoŋbedo idwoko kwayo paran.

⁸Rwoth, ongoye were ma cale in, ongoye m'otieko timo gim'itieko timo.

⁹Nonin je m'icweyo, jolabino to jokule piny ruwaŋin Awi Rwoth, jobino miyo nyingin dwoŋ.

¹⁰Kole idwoŋ aka itimo gir'aura, in kende iŋat'ibedo Were.

¹¹Fonjan yo perin, Rwoth, ŋey awothi iy'adieri perin, fonjan lworo nyingin gi cunyan je.

¹²Abino pakin gi cunyan je, Awi Rwoth Were paran, abino miyo nyingin dwoŋ cil gi cil.

¹³Kole mar perin makiwire dwoŋ, ibothan kwoŋ tho.

¹⁴Jonoro jobino monjan, Awi Were, jogero jotemo nekan, ji ma jokiwinjin.

¹⁵To in Rwoth, ibedo Were ma jawor aka nitie gi mar, ikimaki nge piyo, ipoŋ gi mar makiwire aka itimo adieri.

¹⁶Wire bongan aka imaki kodan wor, miy ŋeca perin meni, aka both wod pa ŋeca perin madhako.

¹⁷Nyuthan ranyuth ma ŋono perin, ŋey jono ma jodakan jowoneni to jobedo giwickwot, ka joneni ni Rwoth okweyo cunyan to konyan.