Read dhopadhola Zabuli 88 Bible Online

Zabuli 88 - dhopadhola bible

Zabuli 88

¹Awi Rwoth, Were paran, alwoŋo ri kony ndelo gipi, aka wor aywak ruwaŋin.

²Winji kwayo paran, cik ithin ri ywak paran ri kony.

³Kole adundo paran opoŋ teko, aka kwo paran cegin gi tho.

⁴Acalo gi ji man ma jocegin tho, abedo jacwo m'ongoye gi meni.

⁵Ajwangere bongi jom'otho, acalo jom'onek ma joriere i bur pajo, jono ma wiyin owil gi jo kicutho, kole ikinyal konyo jo.

⁶Ibolan i lutho ma bur, i bur macol loyo, aka luth loyo.

⁷Nge perin pek kwoŋan, aka aŋinyere iy'asur mere.

⁸Imiyo merin paran jojwangan, imiyan bedo mbeyo rijo. Amoko m'akinyal kwalok.

⁹Waŋan ocore ro rem, Rwoth, alwoŋin kisi ndelo, aka atiŋo cingan malo rin i kwayo.

¹⁰Itimo gir'aura ri jom'otho? Jom'otho bende joay to jopakin?

¹¹Mari perin makiwire bende iluwo kwoŋe i bur, kosa adieri perin i kabedo ma rerok?

¹²Gir'aura perin bende oŋeyere i mudho, kosa bero perin i lowo ma wicwil?

¹³To aywak rin ri kony Rwoth, kisi odikin akwayin.

¹⁴Rwoth, raŋo ikweran? Raŋo iwire woko kwoŋan?

¹⁵Wok i thino paran, atieko candirok t'abedo cegin gi tho, acandere i gir'acula perin, angoye gi kony.

¹⁶Keme perin oŋinyan, goco perin oreyan.

¹⁷Jothokan odieceŋ gipi paka mikula pi, jouman i kisi thenge.

¹⁸Imiyo kiri jamitirok aka mere paran jwangan, mudho kende am'othokan.