Read dhopadhola Zabuli 89 Bible Online

Zabuli 89 - dhopadhola bible

Zabuli 89

¹ Rwoth, abino wero mar perin makiwire noknok, abino tuco gi dhokan adieri perin ri luse je.

²Kole mar perin bedo cil gi cil, adieri perin ocwiny paka polo.

³Iwaco ni, “Atieko timo cikirok gi jacwo m'atieko yero, atieko kwoŋirok ri ŋeca paran Daudi.

⁴Nyikwayin jobino bedo kere noknok, abino geto keri perin ri luse je.”

⁵Weyi polo wopak gir'aura perin Rwoth, jomaleŋ jowower kwoŋ adieri perin i cokirok.

⁶Ongoye ŋata cale kodin i polo, ongoye cwec ma polo ma cal Rwoth.

⁷Ilworin i cokirok pa jomaleŋ, aka joje jocungo gi lworo rin.

⁸Awi Rwoth pa lwak jolweny, ŋa ma jameni paka in, Awi Rwoth, itimo adieri i gimoro je.

⁹Idhumo nam ma ucere, ikweyo asur mere mager.

¹⁰Iŋinyo woko thwol Rahab t'ineko, ikengila jokwor perin gi cingin ma dimeni.

¹¹Polo gi piny je obedo aperin, icweyo piny gibe gi gima nitie i iye je.

¹²Icweyo yumalo gi yupiny, got Tabor gi Hamon jowero rin ri kisangala.

¹³Cingin dimeni, meni perin dwoŋ!

¹⁴Keri perin cungo i wi timo gim'otire gi tiro, mar g'adieri nenere i gim'itimo je.

¹⁵Josilwany a jono ma joŋeyo lamin gi wer, ma jowotho i lero ma ruwaŋin, Rwoth.

¹⁶Josiemere ndelo gipi kwoŋbedo in, aka jopakin ro bero perin.

¹⁷Kole ibedo dwoŋ gi meni pajo, i mar perin imiyo wan loyo.

¹⁸Kole kwot mawan obedo apa Rwoth, in, Were maleŋ pa Isiraili imiyo wan kere mawan.

¹⁹Cango con iwaco ri ŋecin perin ma jor'adieri ni, “Aketho sangaria kwoŋ ŋata jameni, amiyo keri ri ŋat'ayero wok kwoŋ ji.”

²⁰Aketho ŋeca paran Daudi bedo kere, awiro go gi mo maleŋ.

²¹Meni paran bino bedo gi go noknok, cingan bino loko go matek.

²²Jokwor pere jokibino loyo go, jokidakana jokibino kikengila go.

²³Abino ŋinyo jokwor pere, t'aneko jono ma jodak go.

²⁴Adieri paran gi mar paran makiwire bino bedo gi go, abino miyo go loyo noknok.

²⁵Abino yaro dhum pere i wi nam, gi i wi malawin.

²⁶Go bino ywak ran ni, in ibedo baba, Were paran, aka tele ma both paran.

²⁷Abino loko go okayo paran, kere madwoŋ loyo kerin je.

²⁸Abino kuro kwoŋirok paran rigo, aka cikirok paran gi go bino bedo cil gi cil.

²⁹Dhum pere bino bedo cil gi cil, nyikwaye jobino bedo kere noknok.

³⁰“Ka nyithindho pere jojwangi cik paran, to jokwero luwo Or paran,

³¹ka jotur cik paran to jokwero kuro Or paran,

³²kenyo abino miyo jo gir'acula ro reco pajo, abino miyo jo candirok ro komo jo.”

³³T'akibino kwanyo mar paran kwoŋ Daudi, kosa weyo m'akikuro kwoŋirok paran rigo.

³⁴Akibino turo cikirok paran gi go, kosa kada wiro kwoŋirok m'atimo gi go.

³⁵“Akwoŋere ma dicel aka kicutho gi nyingan maleŋ, ni akibino twodo ri Daudi.

³⁶Go bino bedo gi nyikwaye noknok, aka abino kuro keri pere kafodi ceŋ liel.

³⁷Bino bedo cil gi cil paka dwe, mijulisi mar'adieri no i polo.”

³⁸To onyo pama imako nge gi kere perin m'iyero, ijwango go aka ikwero go.

³⁹Ituro cikirok perin m'itimo gi ŋeca perin, aka ibolo sangaria pere i fukefuke.

⁴⁰Ituro piny kor tindi pere madwoŋ, aka isika woko kapondo pere.

⁴¹Ŋata luwo je kwalo gigipiny pere, aka joger pere je jonyero go.

⁴²Imiyo jokwor pere loyo, imiyo jo siemirok.

⁴³Iloko gilweny pere m'ongoye kony, aka iweyo okengila go i lweny.

⁴⁴Imayo go dwoŋ pere paka kere, aka ikelo dhum pere i gike.

⁴⁵Imiyo go ti piyo, t'ikelo rigo wickwot.

⁴⁶Rwoth, inopondi kiri keraŋo? Inomaki nge kiri keraŋo?

⁴⁷Poyi ni kwo paran cek, poyi ni icweyo ji je ma wanyalo tho!

⁴⁸Ŋa manyalo kwo makitho? Ŋa manyalo botho adundo pere kwoŋ meni pa tho?

⁴⁹Rwoth, nikune mar perin makiwire macene? Nikune cikirok perin m'itimo ri Daudi?

⁵⁰Poyi nger m'iyet'iye ŋeca perin, nger m'acir'iye lam pa jokafir.

⁵¹Jokwor perin joyeto kere perin m'iyero, Awi Rwoth! Joyeto go kisi kama go kidh'iye.

⁵²Pak win Rwoth cil gi cil! Ameno! Ameno!