Read dhopadhola Zabuli 91 Bible Online

Zabuli 91 - dhopadhola bible

Zabuli 91

¹Ŋata bwok bongi Jamalo swa, ŋata nindo i bwombi Jameni je,

²nyalo waco ri Rwoth ni, “Ibedo kapondo paran aka ikwonga an. Ibedo Were paran, agenin.”

³Go bino kikwonga in kwoŋ teko m'opondo gi kwoŋ two ma neko jo je.

⁴Go bino umin gi bwombe, aka ibino nwaŋo bonge kapondo, Were timo adieri go bino kikwonga in to gwokin.

⁵Ikir'ilwor teko moro je wor, kosa asere m'icelo odieceŋ,

⁶kosa two nundu ma bino i mudho kosa rerok odieceŋ maler.

⁷Ji gana jonyalo podho ma jotho ka ŋetin, gana apar thokin, t'ikibino core ka bongin.

⁸Ibino nyaka ŋiyo gi waŋin, t'ineno nger m'imiy'iye jokidakana gir'acula.

⁹Kwoŋbedo iloko Rwoth kapondo perin, Jamalo swa kabwok perin,

¹⁰ongoye raco ma bino podho rin, ongoye lweny ma bino core cegin gi peco perin.

¹¹Kole go bino miyo jomalaika pere kurin, kikwonga i yo perin je.

¹²Jobino tiŋin i cingi gin, tiendin wokiri wolimi litho kwoŋ telin.

¹³Ibino nyono simbwore gi thwole, simbwore mager gi thwole ma jokwir.

¹⁴Were waco ni, “Abino botho jono ma jomaran, t'akwonga jono ma joyeyan paka Rwoth.

¹⁵Ka jolwoŋan, abino dwoko jo, ka jobedi i teko, abino bedo gi jo. Abino botho jo t'aworo jo.

¹⁶Abino miyo jo kemba ma kwo mabor, Abino botho jo.”