Read dhopadhola Zabuli 94 Bible Online

Zabuli 94 - dhopadhola bible

Zabuli 94

¹Rwoth, in ibedo Were ma culo kwor, nyuthi nge perin.

²Ibedo jathum banja ri piny, ay aka imiy jonoro gima ripo gi jo!

³Jokidakana josangala kiri keraŋo? Kiri keraŋo, Awi Rwoth?

⁴Jonek jonor kiri keraŋo to jodele gi neki pajo?

⁵Rwoth, joŋinyo ji perin, aka jodiyo ji ma jobedo aperin.

⁶Joneko citho gi jopath, kodi nyithindho kic.

⁷Jowaco ni, “Rwoth kinen wan, Were pa Isiraili kiŋey.”

⁸Kure win, ji ma jokiniaŋ, winofonjere keraŋo?

⁹Were m'ocweyo ithi ji, go kiwinji? Go m'otimo waŋ ji, kinen?

¹⁰Go ma tiro nonin, kilamiyo jo gir'acula? Go ma fonjo ji rieko,

¹¹oŋeyo paro pa ji, oŋeyo nger ma paro pajo ongoye rieko.

¹²Rwoth, josilwany a jono m'ifonjo, jono m'ifonjo cik perin!

¹³Iywomo jo kwoŋ ndelo ma teko, cuka ikunyo bur ma ciko jokidakana.

¹⁴Kole Rwoth kilajwango ji pere, go k'owey jono ma jobedo apere.

¹⁵Tiro bino nwaŋere i kapido kendo, aka jono ma cuny gin olony jobino thielo.

¹⁶Ŋa m'omonji ran jokidakana? Ŋa manitie i thenge paran kwoŋ joreco?

¹⁷Kabedi Rwoth oyido k'okonyan, dinyo adundo paran okidho i piny pa jom'otho.

¹⁸Rwoth, munyo oyido aparo ni tiendan ocer, mar perin makiwire omakan.

¹⁹Kisi k'aparo aka arembo, ikweyo cunyan aka imiyan kisangala.

²⁰Jodhum ma jokidakana jokinyal riwirok kodin, kole joloko ngoye pa tiro cik,

²¹jotimo can kwoŋ jomaber aka jothumo banja ma tho ri joma bubanja.

²²To Rwoth olokere kapondo paran, Were paran obedo tele paran.

²³Go bino miyo jo gir'acula ro kidakana pajo, to reyo jo ro reco pajo, Rwoth Were mawan bino reyo woko jo.