Read dhopadhola Agecin 12 Bible Online

Agecin 12 - dhopadhola bible

Agecin 12

¹Nyatoro m'omaro fonji omaro ŋeyo, to jono ma jokimiti ni wotir jo jomiŋ.

²Joma beyo jonwaŋo ŋono wok bongi Rwoth, to jono ma jotimo can marac Rwoth thumo rijo banja.

³Ongoye ŋata cungo matek gi kidakana, to cakirok ma tiro kilarere.

⁴Dhako maber obedo delok gi kisangala pa cwore, to dhako ma kelo wickwot ri cwore cal topo ma bedo i coko pere.

⁵Can pa jom'otire ber, rieko pa jokidakana obedo twodo.

⁶Wac pa jokidakana obedo podho apondi ma tho, to wac pa jom'otire botho jo.

⁷Jokidakana ikengila jo to jorumo, to nyithindho pa jom'otire joyindira.

⁸Ifoyo dhano ro rieko pere, to jawictek icayo.

⁹Ber wocayin to kareno inigi ŋeca, loyo k'iwon imiyere dwoŋ t'ingoye gi cemo.

¹⁰Jom'otire joŋeyo gim'ogwaŋe pajo mito, to jokidakana joger ri apajo.

¹¹Jono ma jofuro lowo pajo jolabedo gi cemo kweth, to jono ma jonyeko hongo luwo gim'ongoye kony jomiŋ.

¹²Jokidakana jogomba gima wok i tim ma kidakana, to tim pa jom'otire nyak olemo.

¹³Imako joreco gikibenga ma dhok jo, to jom'otire jokwale kwoŋ teko.

¹⁴Wok kwoŋ gimaber ma dhok jo, dhano poŋ gigipiny mabeyo, aka tic ma kwok nigi kemba mere.

¹⁵Jomamiŋ joparo ni tim pajo wegi otire, to jomariek jowinjo fonji.

¹⁶Jomamiŋ jokiru nyutho nge pajo, to jomariek jokidew kwoŋ yet.

¹⁷Nyatoro ma luwo adieri waco gim'otire, to jakony ma twodo luwo gitwodo.

¹⁸Wac ma dhano luwo ma kipar kwoŋ gim'awaco, nyalo yaŋo dhano paka abor, to lew jomariek kelo both.

¹⁹Dhok jo ma genere yindira cil gi cil, to dhok jo ma twodo bedo nyaka hongo macek.

²⁰Twodo nitie i paro pa jono ma jotimo can marac, to jono ma jofonjo siem jonigi kisangala.

²¹Ongoye teko ma mako jom'otire, to jokidakana jopoŋ gi litho.

²²Lew jo ma twodo obedo amien ri Rwoth, to jono ma jotimo gim'otire jobedo yodirok pere.

²³Dhano mariek kano ŋeyo, to paro pa jamiŋo tuco miŋo.

²⁴Tic gi yilo lamiyin meni, to joma nyap ilamiyo jo tic arom.

²⁵Rembo kimiy dhano kisangala, to wac maber miyo go kisangala.

²⁶Dhano m'otire miyo nyawote rieko, to royo pa jokidakana rwenyo jo.

²⁷Joma nyap jokinwaŋ gima jomito, to jomayil yil jolanwaŋo ŋaŋo ma dicwe.

²⁸Yo m'otire kelo kwo, to yo marac kelo tho.