Read dhopadhola Agecin 13 Bible Online

Agecin 13 - dhopadhola bible

Agecin 13

¹Nyathi mariek ciko ithe ka bamere fonjo go, to jawictek kiwinji fonji.

²Ji mabeyo jolimo kemba ri gima jowaco, t'awanya pa jotwodo obedo timo akaka.

³Jono ma jogwoko dhok jo jokwonga kwo pajo; to jono ma joluwere kicar jorere.

⁴Awanya pa janyapo nitie kweth, to kilim gimoro, to jatic matek limo kisi gimoro.

⁵Jom'otire jodak twodo, to jokidakana jotimo giwickwot gi lifol.

⁶Tiro kwonga ŋata timo gimaber, to reco kengila jakidakana.

⁷Jomegi jotere ni joŋaŋ, kucel jongoye gi gimoro; joman jotere ni jocandi, kucel jonigi lim kweth.

⁸Ŋaŋo obedo gima botho kwo pa dhano, to jacandi kilim atise.

⁹Jom'oŋaŋ jocale lero maliel, to jokidakana jocale tala ma tho.

¹⁰Jodelok jokitim gimoro kwanyo teko, to rieko nigi jono ma jowinjo fonji.

¹¹Ŋaŋo m'inwaŋo gi kwakirok lalokere mathin, to jono ma jocoko adec adec jolabedo gi mathoth.

¹²Ka geno owire cuny jo ŋedhere, to ka gim'oyido iparo otundo i kare bedo yath ma kwo.

¹³Jono ma jokwero fonji m'imiyo jo, jokelo rerok kwoŋ jo, to jono ma jowinjo or ibino miyo jo kemba.

¹⁴Fonji pa ŋatariek obedo cakirok ma kwo, jobino bongin kwoŋ bwo ma tho.

¹⁵Rieko miyin ilimo dwoŋ, to tim pa jotwodo obedo rerok pajo.

¹⁶Ŋatariek timo kisi gimoro gi ŋeyo, to jamiŋo nyutho miŋo.

¹⁷Jamikwenda marac kelo teko, to jamikwenda ma genere kelo both.

¹⁸Candi gi lifol jobedo apa ŋata kiwinji fonji, to ŋata winjo fonji imiyo dwoŋ.

¹⁹Gim'igomba t'inwaŋo kelo kisangala, to weyo timo gimarac obedo amien ri jomamiŋ.

²⁰Ŋata wotho gi ŋatariek lokere mariek, to jawodhi jomamiŋ nwaŋo litho.

²¹Lifol luwo joreco, to gigipiny mabeyo labedo kemba pa jom'otire.

²²Joma beyo joweyo gir'alunja ri nyikway jo, to lim pa jareco ithango ri jom'otire.

²³Ndelo pa jacandi nyalo nyak cemo kweth, t'iyweyo woko ro ngoye pa tiro.

²⁴Jono ma jokimiy nyithindho pajo gir'acula jok'omaro jo, to jono ma jomaro nyithindho pajo jofonjo jo.

²⁵Jom'otire jonigi gigipiny kweth acama, to kec neko jokidakana i jo hongo je.