Read dhopadhola Agecin 15 Bible Online

Agecin 15 - dhopadhola bible

Agecin 15

¹Radwok mayom waro woko keme, to wac ma ŋedho cuny jo kwinyo nge.

²Lew jomariek miyo ŋeyo, to dhok jomamiŋ konjo woko miŋo.

³Waŋ Rwoth nitie kisi kamoro, go neno ji mareco gi jomaber.

⁴Lew jo ma bedo moth obedo yath kwo, to wac ma gero turo cuny jo.

⁵Jamiŋo cayo fonji pa janywol, to ŋata winjo fonji obedo ŋatariek.

⁶Peco pa ŋat'otire nitie ŋaŋo kweth, to teko podho kwoŋ lim pa jokidakana.

⁷Dhok jomariek nyayo ŋeyo, gim'ongoye i paro pa jomamiŋ.

⁸Cowirok pa jokidakana obedo amien ri Rwoth, to kwayo pa ŋataber obedo kisangala pere.

⁹Tim pa jokidakana obedo amien ri Rwoth, to go omaro ŋata timo gim'otire.

¹⁰Nitie fonji malith ri ŋata dak yo ma rieko, to ŋata kwero fonji latho.

¹¹K'inen piny pa jom'otho gi rerok joŋamere ruwaŋ Rwoth, to kosa cuny dhano oŋamere nedi?

¹²Ji ma jokano paro jokimiti fonji; jokikidhi bongi jomariek ni jowofonji jo.

¹³Cuny ma sangala miyo waŋ jo kisangala, to rem turo cuny jo.

¹⁴Paro pa ŋata niaŋ dwaro ŋeyo, to dhok jomamiŋ opoŋ miŋo.

¹⁵Ndelo pa jocandi je opoŋ teko, to cuny ma sangala siemere noknok.

¹⁶Ber bedo gi lim manok kareno ilworo Rwoth, loyo bedo gi lim kweth ma kelo teko.

¹⁷Ber camo fufa kama mar nitie i iye, loyo camo riŋo maleny kama dakirok nitie i iye.

¹⁸Ŋata kwako mako nge sigila dhaw, to ŋata kikwakere mako nge kweyo piem.

¹⁹Royo pa ŋata nyap bedo m'oyukino gi kudhin, to royo pa ŋataber bedo m'olony.

²⁰Nyathi mariek sangala bamere, to jamiŋo cayo min.

²¹Miŋo obedo kisangala pa ŋat'ongoye gi rieko, to dhano ma niaŋ timo gim'otire.

²²Ka k'omiyin rieko, can nyekere, to gi jomic rieko gigipiny kweth kadho maber.

²³Miyo radwok m'otire obedo kisangala pa kisi dhano, aka wac maber i hongo ma ripo, nga ber!

²⁴Royo pa ŋatariek tero go i kwo, ma gwoko go kadho i piny pa jom'otho.

²⁵Rwoth turo woko peco pa jodelok, to gwoko kew pa citho.

²⁶Can pa jokidakana obedo amien ri Rwoth, to wac pa jom'olony obedo kisangala rigo.

²⁷Jono ma joworo ri ŋaŋo m'ilimo i royo m'okom jokelo teko ri ji pajo, to jono ma jodak nyew jolakwo.

²⁸Ŋat'otire paro mafodi k'omiyo radwok, to dhok jakidakana konjo woko gimarac.

²⁹Rwoth nitie bor gi jakidakana, to go winjo kwayo pa ŋata timo gim'otire.

³⁰Waŋ jo ma bwonjo sangala jo, wac maber yomo cokin.

³¹Ithi jo ma winjo fonji gikululu, bino bedo i dier jomariek.

³²Jono ma jocayo fonji wegi jocayere, to jono ma jowinjo fonji jolimo niaŋ.

³³Lworo Rwoth obedo fonji i rieko, aka mwolok kelo dwoŋ.