Read dhopadhola Agecin 16 Bible Online

Agecin 16 - dhopadhola bible

Agecin 16

¹Ji jotimo can, to Rwoth ama nigi wac macowe.

²Kisi gimoro je ma dhano timo paro ni ber rigo, to Rwoth pima cuny jo.

³Weyi ri Rwoth tic perin m'itimo, aka can perin lakadho maber.

⁴Rwoth otieko timo kisi gimoro g'atoŋa mere, kiri jakidakana ri ndelo ma teko.

⁵Jono je ma jogwayo jobedo amien ri Rwoth, aridho rin ni, jolalimo gir'acula.

⁶Iculo reco gi cikirok ma mar gi genirok, aka nyatoro lworo Rwoth ka gwokere kwoŋ gimarac.

⁷Ka tim pa ji sangala Rwoth, go miyo kiri jokwor pajo bedo i siem gi jo.

⁸Ber bedo gi gimoro nyaka mathin m'inwaŋo i yo m'otire, loyo bedo gi gimoro kweth kareno inwaŋo i yo m'okom.

⁹Ji jonyalo timo can, to Rwoth ama nyutho gir'atima.

¹⁰Wac ma rieko nitie i dhok kere, dhoke kitim reco i thumo banja.

¹¹Rapim m'otire gi latir jobedo apa Rwoth, peko je ma bedo i mugowa obedo tic pere.

¹²Obedo amien ri kere timo gimarac, rupiri kom ma dhum itimo gi tiro.

¹³Dhok jo ma luwo tiro obedo yodirok pa kere, aka go omaro jono ma joluwo adieri.

¹⁴Keme pa Rwoth obedo jamikwenda ma tho, aka ŋatariek bino siemo go.

¹⁵Bwonjo pa kere kelo kwo, aka ŋono pere cal gi pondeponde ma kelo koth i hongo ma cwir.

¹⁶Nga ber nwaŋo rieko loyo zahabu! Limo niaŋ ber loyo feza.

¹⁷Yo pa jomabeyo cero jo timo gimarac, jono ma jokuro yo pajo jokuro kwo pajo.

¹⁸Delok kelo rerok, aka gwayo kelo podho.

¹⁹Ber bedo mamwol i dier jocandi, loyo poko gim'onyaga gi jodelok.

²⁰Jono ma jociko ithi jo i gimoro jolanwaŋo bero, aka josilwany a jono ma jogeno i Rwoth.

²¹Ŋatariek i cuny ilwoŋo ni janiaŋ, aka luwo mamit medo dwoŋo jo.

²²Rieko obedo cakirok ma kwo ri ŋata nitie gine, to miŋo obedo gir'acula pa jomamiŋ.

²³Paro pa ŋatariek miyo luwo pere bedo ma rieko, aka fonji pere dwoŋo jo.

²⁴Wac ma wor cal gi apede kic, mit ri adundo aka miyo del lama.

²⁵Ruman nitie royo ma cal ni otire, to rumacen tero jo i tho.

²⁶Awanya pa jotic miyo jo tic matek, aka kec pajo ruma jo.

²⁷Dhano ma bukony timo can marac, aka luwo pere cal gi mac ma waŋo jo.

²⁸Jowictek jonyayo awaca nyingi, aka jamwoŋo poko merin ma jomitere.

²⁹Dhano ma jagwayo wondo wadi, aka tero jo i yo ma kiber.

³⁰Dhano ma mbieto waŋe timo can ma kiber, aka ŋata kudo dhoke miyo gimarac timere.

³¹Lwar obedo sangaria madwoŋ, inwaŋo i kwo m'otire.

³²Ŋata kikwakere mako nge ber loyo jomeni, aka ŋata kweyo nge pere ber loyo ŋata mako tindi madwoŋ.

³³Ji jobolo kwir, to Rwoth ama ridho gimoro je.