Read dhopadhola Agecin 22 Bible Online

Agecin 22 - dhopadhola bible

Agecin 22

¹Ber yero nyingi jo maber loyo ŋaŋo madwoŋ, aka wor ber loyo feza gi zahabu.

²Jocandi gi joŋaŋo jorom ama, Rwoth am'ocweyo joje.

³Jomariek joneno teko bino to jopondo, to joparo macek jomedo kidho yu kama teko nitie i iye, aka jocandere.

⁴Kemba ma mwolo gi lworo Rwoth, obedo ŋaŋo gi dwoŋ kodi kwo.

⁵Kudhin gi bwo opoŋ i yo pa jokidakana, to ji ma jokure jobedo bor gine.

⁶Fonji nyithindho i yo m'otire, aka ka jotegino, jokilakigayagaya.

⁷Joŋaŋo jodhumo jocandi, aka jakikopa obedo ŋeca pa ŋat'okopa go.

⁸Ŋata cwoyo gima butiro lakeco teko, aka gero pa dhano bino rumo.

⁹Jono ma jopoko gimoro jobedo josilwany, kwoŋbedo jopoko cemo pajo ri jocandi.

¹⁰Riemi woko jaminyom, aka piem larumo, dhaw gi yetirok larumo.

¹¹Ŋat'omaro cuny m'olony aka luwo pere opoŋ wor, labedo mere pa kere.

¹²Waŋ Rwoth kuro ŋata luwo adieri, to go kwero woko wac pa jotwodo.

¹³Ŋata nyap waco ni, “Simbwor nitie woko, aka lanekan i royo.”

¹⁴Dhok dhako ma jakidakana obedo bur maluth, aka ji ma Rwoth odak jopodh'iye.

¹⁵Miŋo poŋ i cuny jayac, to fonjo go kula kwanyo woko.

¹⁶Diyo jocandi ŋey dhano woŋaŋ, gi nyewo joŋaŋo, kelo nyaka rem.

¹⁷Me wac pa jarieko. Ciki ithin iwinji wac paran, aka kethi fonji paran i paro.

¹⁸Kole labedo rin kisangala k'ipoyo kwoŋe, k'iluwo kwoŋe.

¹⁹Ameno ilaketho geno i Rwoth, ato atieko miyin ŋeyo jo konon.

²⁰Kole atieko ndiko rin wac piero adek, ma rieko gi ŋeyo.

²¹Ma nyuthin gim'otire g'adieri, ŋey inyal miyo radwok m'otire ri jono ma joorin.

²²Ikir'inyaga jocandi kwoŋbedo jobedo jocandi, kosa iŋisa ji ma bu gimoro i kapido.

²³Kole Rwoth ama osa rijo, aka go piro kwo pa ŋata piro jo.

²⁴Ikir'imaki mere gi ji ma jo nge macek, aka ikir'imakere gi ji ma jokano ŋonge.

²⁵Inyalo fonjirok kula pajo, t'imoko i bwo.

²⁶Ikir'ibedi acel kwoŋ jono, ma jocungo ri banja pa ji.

²⁷K'ingoye gi gim'inyalo culo gine banja, ilamayin kanindo perin.

²⁸Ikir'ikodi kew macon, ma kwarere perin joketho.

²⁹Jono ma jotimo tic gi kinen, jolatic ri kerin, aka jokilatiyo ri ji ma kisi ndelo.