Read dhopadhola Agecin 24 Bible Online

Agecin 24 - dhopadhola bible

Agecin 24

¹Ikir'imaki nyeko gi jokidakana, kosa iwanya bedo kanyacel gi jo.

²Kole timo teko kende ama joparo kwoŋe, aka dhok jo luwo can marac kende.

³Peco getere gi rieko, cakere gi niaŋ.

⁴Kisikin mere poŋ ro bedo gi ŋeyo, gigipiny ma welo kodi maŋon.

⁵Ŋatariek tek loyo ŋatatek, aka ŋata nigi ŋeyo tek loyo jameni.

⁶Kole inyalo cako lweny gi can ma rieko, aka mic rieko kweth kelo loyo.

⁷Jomamiŋ jokiniaŋ rieko, ongoye gima jonyalo yawo dhok jo luwo i kapido.

⁸Ŋata cano timo raco, ilalwoŋo go ni jamifuto.

⁹Can ma miŋo obedo reco, aka jaminyom obedo amien ri ji je.

¹⁰K'ilocere i ndelo ma teko, meno ingoye gi meni adieri.

¹¹Ikir'igal gi botho jono m'itero neko, kareno jongoye gi banja.

¹²Inyalo rin waco ni kimaki kwoŋin, to Were ma kaŋasa cuny ji oŋeyo atoŋa perin. Go ma kuro adundo perin oŋeyo, aka laculin cungo kwoŋ tim perin.

¹³Nyathi paran, cami mo kic, kwoŋbedo obedo gimaber rin, aka mo kic ma thon wok i ode mere mit i lewin.

¹⁴Ŋey odoco ni rieko ber ri adundo perin, k'ilimo rieko, ilabedo gi kwo ma yuwaŋe, aka geno perin kilarumo.

¹⁵Ikir'ibedi paka jobanirok jotimo kwoŋ pecin pa joma timo gim'otire, ikir'icani kwalo pecin pajo.

¹⁶Makada nende jopodhi dibirio, jolaay kendo, to teko reyo woko jokidakana.

¹⁷Ikir'isangala ka jokwor perin joromo gi teko, aka ikir'iwey cunyin wosiemere ka jocer.

¹⁸Kole Rwoth laneno aka kilakisangala, to kwanyo woko nge pere kwoŋ jo.

¹⁹Ikir'irembi ro ji mareco, aka ikir'imaki nyeko gi jokidakana.

²⁰Kole jokidakana jongoye gi kwo ma yuwaŋe, aka tala pajo latho.

²¹Nyathi paran, lwor Rwoth gi kere, aka ikir'ikwer winjo acel kwoŋ jo.

²²Kwoŋbedo jonyalo kelo teko abwap, aka ŋa m'oŋeyo teko ma joje jonyalo kelo?

²³Me bende wac pa jarieko. Timo nyakucel i thumo banja kiber.

²⁴Ŋata waco ri jakidakana ni bubanja, ji jolakwoŋo go, aka piny ladak go.

²⁵To jono ma jomiyo jokidakana gir'acula, lakadho maber gi jo aka jolalimo silwany.

²⁶Ŋata miyo radwok m'otire, meno nyutho mere m'otire.

²⁷Yik tic perin ma woko, neni ni kisi gimoro nitie i kare i ndelo, aka nyaka rumacen igeti ot perin.

²⁸Ikir'ibedi jakony ri dhano g'atoŋa marac, aka ikir'iluw twodo gi dhokin.

²⁹Ikir'iwaci ni ilatimo ri ji paka bende jotimo rin, alaculo jo gima jotieko timo.

³⁰Abino aluwo cegin gi ndelo pa ŋata nyap, cegin gi ndelo vini pa jamiŋo,

³¹aka neni, oyido oyukino gi kudhin, aka piny mere oyido opoŋ okure, aka kor cel ma telin otur woko.

³²Aneno gime t'aparo kwoŋe, akaŋasa aka anwaŋo fonjirok.

³³Nindo nyaka mathin, kosa nur nyaka mathin, kosa dolo cingin nyaka mathin ywomirok,

³⁴kelo candi abwap paka jakwo, aka miyin ibedo ma bu gimoro paka jalweny m'oyikere lweny.