Read dhopadhola Agecin 25 Bible Online

Agecin 25 - dhopadhola bible

Agecin 25

¹Me agecin pa Solomon man ma jodhum pa kere Hezekia ma Yuda jokopila.

²Obedo dwoŋ pa Were pano gigipiny, t'obedo dwoŋ ri kerin dwaro gigipiny.

³Paka polo oŋawere, aka piny luth, apaka paro pa kerin kiŋeyere.

⁴Yuy woko nyal wok i feza, aka jandijo lanwaŋo gitimo atawo.

⁵Kwany woko jokidakana ruwaŋ kere, aka ker pere labed'iye tiro.

⁶Ikir'ipakere ruwaŋ kere, kosa irendere ni ibedo ŋatadwoŋ.

⁷Ber ka okodin bedo i kabedo ma malo, loyo k'owaci rin ay i kabedo ri ŋata loyin gi dwoŋ. Gima waŋin oneno,

⁸ikir'ikwaki tero i kapido. Kwoŋbedo ilatimo aŋo i cowe, ka jager perin okwot wiyin.

⁹Osa wac mewin gi jager manyaliŋliŋ, aka ikir'iwodhi kamaler.

¹⁰Kakameno ŋat'owinjin lasewo wiyin, aka ikilanyalo ciro.

¹¹Wac ma luwere i kare, cale kicin ma zahabu i gim'othedhi gi feza.

¹²Apuse ma rieko ri ŋata ciko ithe, cale peta ma zahabu kosa thiwino ma zahabu.

¹³Jomikwenda ma jotimo adieri ri ŋat'ooro jo, jocale tor m'omakere i hongo ma keco, jodwoko kwo ri jodongo pajo.

¹⁴Ŋata pakere gi ciko mic ma kimiy, cale pondeponde gi koyo ma kikel koth.

¹⁵Bedo moth nyalo dwoŋo jadhum, aka lew jo mafoth nyalo turo cuny matek.

¹⁶K'inwaŋo mo kic, cami nyaka ma romin, ka k'obedo ameno, k'icamo kweth inyalo ŋok.

¹⁷Tiendin wokiri woasa terin i ot pa jager perin, ka k'obedo ameno jager laol kodin to dakin.

¹⁸Ŋata luwo gitwodo kwoŋ jager, cale abiro ma lweny, abor g'asere mabith.

¹⁹Geno ŋat'ongoye gi yeyo i hongo ma teko, cal lak jo ma yengere kosa tiendi jo m'oŋol.

²⁰Ŋata wero wer ri cuny ma rembo, cal ŋata mayo dhano nanga i ŋico, kosa cumbi m'orey iy'adhola.

²¹Ka jokwor perin kec neko jo, miy jo cemo jowocami, aka ka riyo neko jo, miy jo pi jowomadhi.

²²Kole ameno apaka iladhuro cuk mac i wi jo, aka Rwoth lamiyin kemba.

²³Awaca nyingi kelo nge, Paka koyo ma yumalo kelo koth.

²⁴Ber bedo i sonda ma wi kisul ot, loyo bedo gi dhako ma jakigeŋisa i ot.

²⁵Paka pi maŋic ber ri adundo ma riyo neko, bende apaka wac maber m'owok i piny mabor cal.

²⁶Ŋata timo gim'otire ma miyere ri ŋatarac, cal waŋ pi m'opoŋ cwodho kosa jwom makoc.

²⁷K'obedo gimaber camo mo kic mathoth, kosa rango dwoŋ i wi dwoŋ.

²⁸Ŋata kinyal kuro dwoŋ, cale tindi madwoŋ m'othangere, m'ongoye gi kor ot.