Read dhopadhola Agecin 26 Bible Online

Agecin 26 - dhopadhola bible

Agecin 26

¹K'obedo gimaber miyo jamiŋo dwoŋ, paka pe kiber i hongo ma milengela kosa koth i hongo ma keco.

²Kwoŋ m'ongoye atoŋa kinyal tundo kwoŋin, paka obico ma ay to sala m'ongoye gi kapie.

³Kayina mito kiboko, paka punde mito tweyo dhok jo, aka jamiŋo mito goco.

⁴Ikir'idwok jamiŋo cungo kwoŋ miŋo pere, kosa in bende ilacale jamiŋo.

⁵Dwoki jamiŋo cungo kwoŋ miŋo pere, aka go lacale ŋatariek ruwaŋe.

⁶K'ioro jamiŋo tero mikwenda, meno cal ŋado tiendi dhano gi madho kwir ma neko jo.

⁷Jamiŋo nyalo wiro ageca gi dhoke, paka tiendi jar'aŋolo nyalo wiyirok.

⁸Miyo jamiŋo dwoŋ, cal tweyo tele iy'asumulo.

⁹Paka jamero futere golo kudho m'ocwowo cinge, apaka jamiŋo futere g'ageca i dhoke.

¹⁰Jadwoŋ ma miyo kisi dhano litho, cal ŋata miyo jamiŋo kosa jamero ma joluwo rigin tic.

¹¹Jamiŋo ma luda miŋo pere, cal gwok ma wire to camo ŋok pere.

¹²Dhano mariek ruwaŋe, kiri jamiŋo nitie gi geno loyo go.

¹³Ŋata nyap waco ni, “Simbwor nitie woko, aka lanekan i royo.”

¹⁴Ŋata nyap wire i kanindo, paka thigo wire i miango mere.

¹⁵Ŋata nyap lutho cinge i bakul, aka bedo rigo olo swa rwako i dhoke.

¹⁶Ŋata nyap paro ni go riek, loyo ji abirio ma jomiyo radwok ri atoŋa maber.

¹⁷Ŋata donjo i dhaw ma k'apere, cal woth i royo t'iliero gwok m'inwaŋo gi ithe.

¹⁸Paka janeko ma celo gilweny ma neki g'aserin cal,

¹⁹apaka bende ŋata wondo jager to waco rumacen ni oyido loko wac cal.

²⁰Ka yen ongoye, mac tho, aka kama mwoŋo ongoy'iye, dhaw rumo.

²¹Paka maka wodho cuk m'okur aka yen moko mac, apaka bende jadhaw cako piem.

²²Wac pa jamwoŋo cal cemo mamit m'icamo gi woro, donjo i iy jo piyo.

²³Dhok jo ma luwo g'atoŋa marac i cuny jo, cal minyin ma feza m'oum gine atawo ma lowo.

²⁴Jakwor rendere i luwo pere, aka kano ŋonge.

²⁵Ka jakwor oluwo gi mwolo, ikir'iyey, kwoŋbedo nitie amien abirio m'opanere i cunye.

²⁶Dhano nyalo umo dakirok gi twodo, to kidakana pa jakwor lathangere i dier lwak.

²⁷Ŋata kunyo bur won lapodh'iye, aka tele lagik to diyo ŋata won cako ŋilo.

²⁸Lew ŋata twodo dak ŋata mito timo rigo marac, aka dhok jo ma twodo kelo rerok.