Read dhopadhola Agecin 27 Bible Online

Agecin 27 - dhopadhola bible

Agecin 27

¹Ikir'ipakere kwoŋ dikin, kole ikuya gima ndelo no nyalo kelo.

²Weyi ŋatiman ama wopakin, makiweno dhokin won, jakicar, makiweno in won.

³Tele pek, aka kwoyo thoth, to peko pajo kiloy nge pa jamiŋo.

⁴Keme ger, aka nge reyo woko, to ŋa manyalo ciro nyeko?

⁵Ber tiro dhano kamaler, loyo mar ma kinyuthi.

⁶Litho ma mere miyo ber loyo, ka jakwor ocwiyo lembin.

⁷Ŋat'oyeŋ kwero kada mo kic, to ka kec nekin, kiri cemo makec bedo mamit.

⁸Ŋata bedo bor gi peco, cal winyo ma bedo bor gi ode.

⁹Mo akudha gi buban sangala cuny jo, to teko turo cuny jo.

¹⁰Ikir'ijwangi mere perin kosa mere pa janywol perin, aka ikir'ikidhi i ot pa wat perin i ndelo ma teko kende. Jager manitie cegin, ber loyo wat manitie bor.

¹¹Bedi mariek nyathi paran, aka miy cunyan wosangala, ŋey anyal dwoko ŋata pusa an.

¹²Jomariek joneno teko bino to jopondo, to joparo macek jomedo kidho yu kama teko nitie i iye, aka jocandere.

¹³Maki nanga pa ŋata cungo ri banja pa jakicar, gi ri banja pa japath.

¹⁴Ŋata m'otho jager gi dwonde malo, ka nyaka ocew odikin, inyalo waco ni kwoŋo go.

¹⁵Dhako ma jakigeŋisa, cal koth ma nyidho makirum.

¹⁶Temo miyo go liŋ, cal kweyo koyo kosa mako mo i cingi jo.

¹⁷Cuma pako cuma nyawote, aka dhano acel yawo paro pa ŋatiman.

¹⁸Ŋata kuro yath vini lacamo olemo mere, aka ŋata kuro jadwoŋ lalimo dwoŋ.

¹⁹Paka pi wotho cal pa dhano, apaka bende paro dhano wotho go kamaler.

²⁰Paka piny pa jom'otho kiyeŋ, apaka bende waŋ jo kiyeŋ.

²¹Paka mac temo feza gi zahabu, apaka bende itemo dhano gi pako go.

²²Inyalo odo jamiŋo gi ŋano i pany gi loki, t'ikinyal wodho woko miŋo pere.

²³Ŋey nger ma mwendi perin joriyo i iye, aka dew kwoŋ dhok perin.

²⁴Ŋaŋo kibedi cil gi cil, aka sangaria kitundi i luse je.

²⁵Nyar lum to thwo, aka man wolothi, nyar lum ma wi tendere.

²⁶Nyithindhi rombo jolamiyin yer rombo ma timo nanga, aka diegi jolawodho pesa ma nyewo lowo.

²⁷Ilabedo gi cak diegi ma romo ma cemo perin, ma romo peco perin gi ŋecin perin manyir.