Read dhopadhola Agecin 3 Bible Online

Agecin 3 - dhopadhola bible

Agecin 3

¹Nyathi paran, wiyin wokiri wowil gi fonji paran, to weyi adundo perin wokur or paran.

²Rupiri fonji paran lamiyin, ikwo oro kweth to medin siem.

³Ikir'iyey mwolo g'adieri jowobudhin, tweyi jo i ŋutin, ndiki jo i pal cunyin.

⁴Ka inotimi gime, ilanwaŋo ŋono gi pak, ruwaŋ Were gi ruwaŋ ji.

⁵Geni Rwoth gi cunyin je, aka ikir'igoŋere kwoŋ gim'iparo nike iŋeyo.

⁶I kisi gimoro je m'itimo, yey go, aka go latiro yo perin.

⁷Ikir'ibedi mariek ruwaŋin, lwor Rwoth, aka iwey timo gimarac.

⁸K'inotim ameno, labedo kwo ri delkwoŋin gi yath ri cokin perin.

⁹Miy Rwoth dwoŋ gi lim perin, kodi olemo marapena ma ranyak perin je.

¹⁰K'inotim ameno, dere perin lapoŋ gi cemo, aka nywero perin lapoŋ gi vini.

¹¹ Nyathi paran, ikir'icay fonji pa Rwoth, kosa ilocere ka go tirin.

¹²Kole Rwoth tiro jono ma go omaro, paka bajo tiro nyathi ma go nor gine.

¹³Jakisangala a ŋata nwaŋo rieko, gi ŋata nwaŋo niaŋ!

¹⁴Rupiri magowa pere loyo magowa ma feza, aka gima go limo loyo zahabu.

¹⁵Rieko obedo gima diwelo loyo nyweny, aka ongoye giman m'igomba m'inyalo kipima gine.

¹⁶Cingi rieko maracuc miyo kwo mabor, aka cinge maracam bed'iye ŋaŋo gi dwoŋ.

¹⁷Dhoyin pere obedo ma kisangala, aka yo pere je obedo siem.

¹⁸Rieko obedo yath ma kwo ri jono ma jogoŋere kwoŋe, jono ma jomako matek jobedo gi kisangala.

¹⁹Rwoth ocweyo piny gi rieko; go ocako polo gi niaŋ.

²⁰Gi ŋeyo pere lutho obare to ŋamere, aka pondeponde thono thoyo.

²¹Nyathi paran, kuri rieko gi niaŋ, ikir'iwey jowobudhi ŋeyo perin.

²²Jolabedo kwo ri cunyin, gi thiwino ri ŋutin.

²³Nyaka ibino wotho i yo perin m'ongoye teko, aka tiendin k'ocer.

²⁴K'inoriere piny, ik'obedi gi lworo, k'inonindi piny, nindo perin labedo mamit.

²⁵Ikir'ibedi gi lworo ri dhier ma bino abwap, kosa amien ma podho kwoŋ jokidakana.

²⁶Kwoŋbedo Rwoth labedo meni perin, to geŋo tiendin cer.

²⁷Ikir'iwey m'ikitimo bero ri jono ma joyenyo, k'inyalo timo ameno.

²⁸Ikir'iwaci ri nyawotin ni, kadhi, inodwoki kendo, alamiyin dikin, kareno inigi gino.

²⁹Ikir'ican timo teko ri jager perin, ma bedo cegin kodin munyo genin.

³⁰Ikir'idhaw gi dhano ma nono, m'ongoye teko m'otimo rin.

³¹Ikir'igomba jogwayo, aka ikir'iyer tim pajo moro je.

³²Kwoŋbedo joreco jobedo amien ri Rwoth, to go nor gi jom'otire.

³³Kwoŋ pa Rwoth nitie i ot pa jakidakana, to go miyo kabedo pa ŋat'otire silwany.

³⁴Ri jorendirok, go bende rendere, to ri jomamwol, go nyutho wor.

³⁵Jomariek jolalunjo dwoŋ, to jomamiŋ jolimo wickwot.