Read dhopadhola Agecin 30 Bible Online

Agecin 30 - dhopadhola bible

Agecin 30

¹Me wac pa Agur wod pa Jake. Dhano waco ri Ithiel, ri Ithiel gi Ukal.

²Adieri amiŋ swa loyo ji je, angoye gi niaŋ ma nyadhano.

³An fodi akifonjere rieko, kosa fodi akiŋeyo gimoro kwoŋ Ŋataleŋ.

⁴Ŋa m'otieko idho polo to loro piny, aka ŋa m'otieko coko koyo i cinge. Ŋa m'otieko mino pi i nanga, aka ŋa m'otieko nwaŋo gike ma piny? Ŋata go ilwoŋo nedi aka nyathi pere ilwoŋo nedi? Adieri iŋeyo.

⁵Kisi wac pa Were tundo i kare, go obedo kwot ri jono ma jopondo i go.

⁶Ikir'imedi wac pere, kosa go lakipusa in, aka ilaŋeyo ni ibedo jatwodo.

⁷Gigipiny ario m'akwayin, Rwoth, aka ikir'ithwonan kafodi akwo.

⁸Kwany woko kwoŋan ngoye g'adieri gi twodo, ikir'imiyan candi kosa ŋaŋo, pidhan gi cemo m'amito.

⁹Kwoŋbedo k'abedo gi mathoth, alakwedin, t'awaco ni, “Rwoth obedo ŋa?” K'abedo jacandi, alakwalo, t'akelo wickwot ri nyingin.

¹⁰Ikir'iluw pokopoko kwoŋ ŋeca ri jadwoŋ pere, kosa ŋeca no lakwoŋin, aka ilabedo jabanja.

¹¹Nitie luse ji ma jokwoŋo bacere pajo, aka jokimiy yokere pajo silwany.

¹²Nitie luse ji ma joparo ni jotire ruwaŋ jo wegi, kucel cilo pajo kilony.

¹³Nitie luse ji ma jo waŋtek, aka jonyoma joman.

¹⁴Nitie luse ji ma lak jo obedo abor, ma lak jo obedo apalin, joreyo woko jocandi i piny, gi ji ma bu gimoro i dier ji.

¹⁵Kacwecwe nitie gi nyithindho manyir ario, joje joywak ni, miy, miy. Nitie gigipiny adek ma kiyeŋ jo, g'aŋwen ma kirom jo.

¹⁶Piny pa jom'otho, ici ma kinywol, piny ma riyo pi neko noknok, kodi mac maliel makitho.

¹⁷Waŋ jo ma nyoma bajo, aka cayo winjo min jo, agak ma milelo jolafudho woko, aka acut jolacuto woko.

¹⁸Nitie gigipiny adek m'obedo gir'aura ran, aŋwen m'akiniaŋ kwoŋe.

¹⁹Yo pa ango ma ay malo i hongo, yo pa thwol ma yware i tele. Yo pa mel m'icewo i name wi pi, kodi nger ma jacwo gi dhako jomitere i iye.

²⁰Me yo pa dhako ma jakidakana, go cemo to yweyo woko dhoke, aka waco ni ongoye gima go otimo.

²¹Nitie gigipiny adek ma piny kirin rijo, aka nitie aŋwen m'akinyal ciro.

²²Ŋeca ma lokere kere, jamiŋo ma bedo gi kisi gima go mito camo,

²³Dhako ma jadakirok ma limo cwore, kodi ŋeca manyako ma tero kabedo pa dhakodwoŋ pere.

²⁴Nitie gigipiny aŋwen ma josisiri i piny, kucel joriek swa.

²⁵Kacuŋino jongoye gi meni, kucel jobedo gi cemo i hongo ma ceŋ.

²⁶Tho jokitek, kucel jogeto pecin pajo i telin.

²⁷Bonyo jongoye gi kere, kucel joŋanjo i tome paka jolweny.

²⁸Ragwe m'inyalo mako i cingin, kucel inyalo nwaŋo jopeco pa kere.

²⁹Nitie gigipiny adek ma jonyumo maŋon neno, aka aŋwen ma jowotho gi noro.

³⁰Simbwor matek loyo i dier ogwaŋe madudi, aka kiwire ŋwec ruwaŋ moro je.

³¹Wod gweno ma koko, wod diel, kodi kere ma nyumo ruwaŋ ji pere.

³²K'inen oyido ibedo jamiŋo ma won pakere, kosa oyido itimo can marac, um dhokin gi cingin.

³³Paka cak afwoya nywolo mo dhiaŋ, apaka um jo cwer remo k'odiy, aka kwinyo nge kelo gorok.