Read dhopadhola Agecin 8 Bible Online

Agecin 8 - dhopadhola bible

Agecin 8

¹Apa winji, Rieko lwoŋo. Niaŋ tiŋo dwonde.

²I wi tendere i thengi royo, kodi i royo go cungo.

³Ruwaŋ waŋkac ma tindi madwoŋ, i thengi waŋkac go goyo dwonde.

⁴Ri wijoje, awi jome, alwoŋo, aka ywak paran obedo ri dhano je makwo.

⁵Win ma wingoye gi nyaŋith, wikifonjere ye niaŋ. Win ma wimiŋ, lim win rieko.

⁶Winji, kole alaluwo wac maber, aka gima lawok i dhokan otire.

⁷Kole dhokan lawaco gir'adieri, kidakana obedo amien ri dhokan.

⁸Wac je ma wok i dhokan obedo adieri, ongoye gim'ogondere kosa m'owire nyaman i jo.

⁹Joje jotire ri dhano ma niaŋ, aka otire ri jono ma jonwaŋo ŋeyo.

¹⁰Yeri fonji paran kapa feza, gi ŋeyo kapa zahabu maber loyo.

¹¹Kole rieko ber loyo nyweny, aka kisi gimoro je m'inyalo mito kipimere gine.

¹²An abedo rieko, akipan wac, anitie gi ŋeyo kodi thumo banja m'otire.

¹³Lworo Rwoth obedo kwero gimarac. Noro, gero, tim marac, gi wac twodo adaki.

¹⁴Abedo jamic rieko gi rieko ma kakare, anigi niaŋ, aka anigi meni.

¹⁵Kerin jodhumo ro an, aka jodhum jocweyo cik maber.

¹⁶Kisi jadhum dhumo gi kony paran, jotel gi jogavana i nger acel.

¹⁷Amaro jono ma jomaran, aka jono je ma jodwaran gi cuny gin acel jonwaŋan.

¹⁸Ŋaŋo gi dwoŋ jonitie kodan, ŋaŋo ma yindira gi kisi gimoro maber.

¹⁹Olemo paran ber loyo zahabu, kada zahabu ma pilin, aka kwot paran ber loyo feza macil.

²⁰Awotho i royo m'otire, aluwo yo ma tiro,

²¹amiyo jom'omaran lunjo ŋaŋo, jopoŋo udi pajo gi gigipiny ma dicwe.

²²Rwoth ocweyan marapena, tic pere marapena cango con.

²³Wok cango con, go okethan, bedo marapena mafodi k'ocwey piny.

²⁴Onywolan mafodi wakawaka, ma waŋ pi fodi ongoye.

²⁵Onywolan mafodi k'ojiengi gote mafodi k'ocwey tendere,

²⁶mafodi Were k'ocweyo polo gi piny, kosa adec lowo ma piny.

²⁷Munyo Were cako polo, oyido anitie, munyo ogoyo nyaraunda i wi wakawaka,

²⁸munyo go timo pondeponde m'ocwiny malo, munyo go oyawo waŋ pi ma wakawaka.

²⁹Go oyiko ri nam gike mere, ŋey pi wokiri wotur or pere. Oyido anitie munyo go jengo kindi piny.

³⁰Oyido anitie ruŋete, paka jageto ma goyo cal ma ot, aka oyido abedo kisangala pere kisi ndelo, afore ruwaŋe noknok.

³¹Afore i piny pere, t'ayodere gi ji.

³²Riameno nyithindho, winjan win. Josilwany a jono ma jotimo gim'awaco.

³³Winji win fonji aka witim girieko, wikiri wijala.

³⁴Jasilwany a ŋata winjan, jono ma jokuro dhiot paran kisi ndelo, ka jokuro i waŋkace ma donjo peco paran.

³⁵Kole ŋata nwaŋan nwaŋo kwo aka limo ŋono wok bongi Rwoth.

³⁶Jono ma jokinwaŋan jolimo litho, aka jono je ma jodakan jomito tho.