Read dhopadhola Agecin 9 Bible Online

Agecin 9 - dhopadhola bible

Agecin 9

¹Rieko otieko geto ot pere, otieko gero sirin pere abirio.

²Go otieko neko le pere, otieko ruwo vini pere, go otieko yiko meza pere.

³Go otieko dhiro ŋecin pere manyir, rieko lwoŋo, wok i kam'oŋawere ma tindi ni,

⁴“Ŋa mamiŋ, weyi go wowire yuthenge me!” Go waco ri jomamiŋ ni,

⁵“Biye win, cami win mugat paran, to wimadho vini paran m'atieko ruwo.

⁶Weyi win timo gimiŋo, aka wibino kwo, tim win girieko.”

⁷Ŋata tiro jarendirok nwaŋo yet, ŋata tiro jakidakana limo litho.

⁸Ikir'itir jarendirok, ladakin, k'itiro jomariek jolamarin.

⁹Miy jomariek fonji, aka jolamedo lokirok mariek, fonji jom'otire aka niaŋ pajo lamedere.

¹⁰Lworo Rwoth obedo cakirok ma rieko, aka ŋeyo Ŋataleŋ, nyutho bedo gi niaŋ.

¹¹Kole gi an, ilamedo kwo perin, aka ilamedo oro m'oromo i kwo perin.

¹²K'iriek, iŋat'ilimo magowa mere, to k'ikwero, iŋat'ilakeŋ.

¹³Dhako mamiŋ ama luwo malo, go kiniaŋ aka ongoye gima go oŋeyo.

¹⁴Go bedo i dhiot pere, kosa i kabedo m'oŋawere ma tindi,

¹⁵ka lwoŋo jono ma jokadho, joma kadho rigin tirtir i yo pajo ni,

¹⁶“Weyi ŋatamiŋ, wowire yuthenge me!” Aka ri jomamiŋ, go waco ni,

¹⁷“Pi m'okwal mit, aka mugat m'icamo nyaliŋliŋ mit loyo.”

¹⁸To jokuya ni tipo pa jom'otho nitie kenyo, aka wendo pere jonitie i pendi piny pa jom'otho.