Read dhopadhola Jafonji 10 Bible Online

Jafonji 10 - dhopadhola bible

Jafonji 10

¹Lwaŋino ma jotho jomiyo mo akudha ŋwece marac, miŋo nyaka mathin reyo woko tim ma rieko gi dwoŋ.

²Cuny ŋatariek thenere i cinge maracuc, to cuny jamiŋo, yu cinge maracam.

³Kiri ka jamiŋo wotho i royo, ongoye gi rieko, aka nyutho kisi dhano ni go miŋ.

⁴Ka cuny pa jadhum oay kwoŋin, ikir'iwey kabedo perin, kole bedo moth lakweyo banjin madongo.

⁵Nitie gimarac m'atieko neno i pendi waŋceŋ, paka komo ma wok bongi jadhum.

⁶Iketho jomamiŋ i kabedo ma malo, aka joŋaŋo jobedo i kabedo masisiri.

⁷Atieko neno ŋecin wi kayinin, aka jodhum jowotho atiendi paka ŋecin.

⁸Ŋat'okuny bur, won lapodh'iye; aka ŋat'otur kor ot, thwol latoŋo.

⁹Ŋat'okuny telin, telin lamiyo go litho, aka ŋat'obar mbawo, mbawo lakelo rigo litho.

¹⁰Ka cuma fol, aka nyatoro kipaki lewe, go ripo oro meni kweth, to rieko konyo dhano nwaŋo bero.

¹¹Ka thwol okayin mafodi k'ofudhi lake, meno jafudhi lake ongoye gi magowa.

¹²Wac ma wok i dhok ŋatariek kelo wor, to dhok jamiŋo reyo woko go.

¹³Cakirok ma wac ma wok i dhoke obedo miŋo, aka luwo pajo cowo i neko ma kelo kidakana.

¹⁴Jamiŋo oyo wac kweth, makada nende ongoye ŋat'oŋeyo gim'obedi, aka ŋa m'owaci rigo gim'obedi ka go otieko ngoye?

¹⁵Olo pa jamiŋo loco woko go, rupiri go kuya kiri royo ma kidho i tindi madwoŋ.

¹⁶Kidamba rin, awi piny, ma kere perin obedo soye, aka jodhum mewin jocemo odikin!

¹⁷Silwany rin, piny, ma kere perin obedo wod kere, aka jodhum mewin jocemo i hongo ma ripo, ma nwaŋo meni, makiweno mero!

¹⁸Wok kwoŋ nyapo, wiy ot riewere, aka wok kwoŋ nyapirok ma cingi jo, ot cwer.

¹⁹Ji jotimo kalima ri nyero, vini miyo kwo bedo gi kisangala, aka pesa cowo teko je.

²⁰I paro perin bende, ikir'ilam kere, kosa ilami jaŋaŋo, kada gi kanindo perin, rupiri winyo ma polo nyalo tiŋo dwondin, kosa cwec moro ma jabwombe nyalo luwo kwoŋe.