Read dhopadhola Jafonji 11 Bible Online

Jafonji 11 - dhopadhola bible

Jafonji 11

¹Cami cemo perin gi ji, kole rumacen ma ndelo kweth ilanwaŋo.

²Pok lim perin i migew ario, kosa kada di boro, rupiri ikuya teko manyalo timere i piny.

³Ka pondeponde jotieko poŋ, to jocwe koth i piny, obedi ni yath opodho yupiny kosa yumalo, i kabedo ma yath no opodh'iye, kenyo ama larier'iye.

⁴Ŋata kuro koyo kilacwoyo, aka ŋata ŋiyo pondeponde, kilakeco.

⁵Paka ikuya nger ma luya ma kwo bino i cokin perin i iy yokin, ameno apaka ikuya tic pa Were, go ma timo kisi gimoro.

⁶Cwoy kodhi perin odikin, aka othieno ikir'iyey cingin wobedi ma k'otimo gimoro; kole ikuya ma lakadho maber, me kosa meca, kosa ka joje jobedi maber.

⁷Paka lero mit, apaka ber ri waŋ jo neno waŋceŋ.

⁸Ka nyatoro okwo ma oro kweth, go ripo kisangala i je; kucel go ripo poyo ni hongo ma mudho labedo kweth. Gima bino je obedo pilok.

⁹Fore awi jayac, kafodi ibedo soye, aka weyi cunyin wosangala in i hongo perin ma soye. Wothi i yo ma cunyin gi gima waŋin neno ni ber, to ŋey ni ri gigipiny me je Were lathumo rin banja.

¹⁰Kwany woko rembo i cunyin, aka kwany woko litho i delkwoŋin, kwoŋbedo thino gi soye jobedo pilok.