Read dhopadhola Jafonji 2 Bible Online

Jafonji 2 - dhopadhola bible

Jafonji 2

¹Awaco iy'adundo paran ni, “Biye pama, alatemo winjo kisangala, t'asiemere.” To neni, me bende obedo pilok.

²Awaco kwoŋ nyero ni, “Obedo miŋo.” Aka kwoŋ kisangala ni, “Kony mere bende aŋo?”

³Arango i cunyan nger ma miyo delkwoŋan kisangala gi vini; makada nende cunyan oyido fodi telan gi rieko, nger ma kiswana miŋo, cuka alaneno ginaŋo maber ma ji jolatimo i pendi polo i hongo ma ndelo macek ma kwo pajo.

⁴Atimo tic madongo, ageto udi ri an won t'apidho ndelin vini ri an won.

⁵Afuro ndelin ri an won, gi ndelin olemo, t'apidh'iye kisi yath ma nyak olemo.

⁶Atimo ri an won kidiwin ma pi m'anyalo dhieko lul ma yen ma jodongo.

⁷Anyewo ŋecin ma cwo gi ma mon, t'abedo gi ŋecin ma jonywole i ot paran. Abedo bende gi lim madwoŋ ma dhok, mwendi, rombo gi diegi, loyo jono je ma jopen bedo ran i Yerusalem.

⁸Acoko ri an won feza, zahabu gi lim pa kerin kodi mar'adece. Anwaŋo jower ma cwo gi ma mon, kodi gima siemo ji, gi mon kweth ma githenge.

⁹Ameno alokere madwoŋ t'aloyo nyatoro je m'open bedo ran i Yerusalem; rieko paran bende odoŋ kodan.

¹⁰Kisi gimoro je ma waŋan ogomba akipano kwoŋ jo; akicero cunyan siemirok, kole cunyan onwaŋo siemirok i tic paran je, aka me obedo kemba paran wok kwoŋ tic paran je.

¹¹Kenyo t'aparo kwoŋ tic je ma cingan otieko timo gi kwok m'aoyo ma timo, aka neni, je obedo pilok gi riemo koyo, aka ongoye magowa i pendi waŋceŋ.

¹²Ameno t'awire paro kwoŋ rieko, neko gi miŋo; aŋo ma jacwo m'obin rumacen pa kere otim? Nyaka gim'otieko timo.

¹³Kenyo t'aniaŋ ni rieko ber loyo miŋo paka lero ber loyo mudho.

¹⁴Jomariek joneno bor, jomamiŋ jowotho i mudho. Kucel aŋeyo bende ni teko acel podho kwoŋ joje.

¹⁵Kenyo awaco i cunyan ni, “Gima timere ri jamiŋo bende latimere ran, onyo raŋo oyido abedo ŋatariek swa?” T'awaco ri adundo paran ni, me bende obedo pilok.

¹⁶Rupiri ongoye rapoy pa jarieko kosa jamiŋo, neno ni i hongo ma bino lanwaŋere ni wiy jo otieko wil gi jo con. To gidhier ni, ŋatariek gi ŋatamiŋ je jolatho?

¹⁷Riameno adaki kwo, kwoŋbedo gima timere i pendi waŋceŋ obedo teko ran; kole kisi gimoro je obedo pilok gi riemo koyo.

¹⁸Adaki olo paran je m'atimo i pendi waŋceŋ, neno ni aripo weyo ri dhano m'obin k'atieko tho.

¹⁹Ŋa m'oŋeyo ka go obedi ŋatariek kosa ŋatamiŋ? Kucel go labedo jadwoŋ ma kisi gimoro je m'atieko ol'iye t'aor'iye rieko paran i pendi waŋceŋ. Me bende obedo pilok.

²⁰Ameno awire t'amiyo cunyan ngoye gi geno kwoŋ tic paran je ma olo paran i pendi waŋceŋ,

²¹Kole nitie dhano m'otiyo i rieko gi ŋeyo kodi ndijo, kucel dhano ma k'otiyo ri gino am'iweyo rigo. Me bende obedo pilok gi gimarac madwoŋ.

²²Dhano olim aŋo i olo pere je gi kinen je ma cunye, ma go ool'iye i pendi waŋceŋ?

²³Kole ndelo pere je opoŋ gi litho, aka tic pajo obedo aŋedha cuny; kiri wor paro pajo kiywomere. Me bende obedo pilok.

²⁴Ongoye gimaber ri dhano ma loyo cemo gi math, to nwaŋo kisangala i tic pere. Me bende, atieko neno ni wok i cingi Were.

²⁵Kole ka k'obedo go, ŋa m'ocem, kendo ŋa m'ofore?

²⁶Kole ri nyatoro maber ruwaŋe, go otieko miyo rieko, ŋeyo gi kisangala; to ri ŋata timo reco, go miyo go tic ma coko gi dhuro, nyaka ma miyo ŋataber ruwaŋ Were. Me bende obedo pilok kodi riemo koyo.