Read dhopadhola Jafonji 3 Bible Online

Jafonji 3 - dhopadhola bible

Jafonji 3

¹Ri kisi gimoro nitie hongo m'oyik, hongo ma ripo ri kisi gima nitie i pendi polo.

²Hongo ma nywolirok, gi hongo ma tho; hongo ma pidho, gi hongo ma fudho.

³Hongo ma neko, gi hongo ma cango, hongo ma turo, gi hongo ma geto.

⁴Hongo ma oyo pigi waŋ jo, gi hongo ma nyero, hongo ma ywak, gi hongo ma miel.

⁵Hongo ma ywoyo telin, gi hongo ma coko telin kanyacel, hongo ma podho akor, gi hongo ma weyo podho akor.

⁶Hongo ma rango, gi hongo ma rwenyo, hongo ma kuro, gi hongo ma bolo woko.

⁷Hongo ma yeco, gi hongo ma kwoyo, hongo ma liŋ, gi hongo ma luwo.

⁸Hongo ma mitirok, gi hongo ma dakirok, hongo ma lweny, gi hongo ma siem.

⁹Jatic olim magowa aŋo wok kwoŋ olo pere?

¹⁰Atieko neno tic ma Were oyimo ri ji ni jowooli gine.

¹¹Go otieko timo kisi gimoro je maŋon i hongo pere ma ripo, medo kwoŋ meno go oketho iy'adundin pajo ŋeyo gima nitie yumalo, kucel ji jokinyal niaŋ tic ma Were otieko timo wok i cako kiri i gike.

¹²Aŋeyo ni ongoye bero rijo, to ri dhano forok gi timo bero i kwo pere,

¹³aka ni dhano je ripo cemo gi medho to neno bero i olo pere, obedo mic pa Were.

¹⁴Aŋeyo ni kisi gimoro je ma Were timo yindira cil gi cil, ongoye gim'inyalo medo kwoŋe, aka ongoye gim'inyalo kwanyo kwoŋe, Were otieko timo, ŋey ji jowocungi i lworo ruwaŋe.

¹⁵Kisi gima nitie, oyido otieko bedo con, kisi gima labedo, otieko bedo con, aka Were larango gim'otieko timere.

¹⁶Kendo atieko neno i pendi waŋceŋ ni, i kabedo pa tiro, kidakana oyido nitie, aka i kabedo pa timo gim'otire, kidakana oyido bende nitie.

¹⁷Awaco i cunyan ni, “Were lathumo banja ri joma timo gim'otire gi jokidakana, rupiri go otieko yiko hongo ma ripo ri kisi gimoro, gi kisi tim.”

¹⁸Awaco i cunyan kwoŋ ji ni Were temo jo ma nyutho ni jocale rigin ogwaŋe.

¹⁹Kole gima podho kwoŋ ji bende ama podho kwoŋ ogwaŋe; paka ji jotho, apaka bende ogwaŋe jotho. Joje jonitie gi luya acel, aka ji jongoye gi gima joloyo gine ogwaŋe; kole je obedo pilok.

²⁰Kisi gimoro je kadho i kabedo acel, kisi gimoro je owok i fukefuke, aka kisi gimoro je gik i fukefuke.

²¹Ŋa m'oŋeyo ka cuny pa ji kadho malo aka cuny p'ogwaŋe loro kadho piny i lowo?

²²T'aniaŋ nyaka ni ongoye gimaber, loyo dhano kisangala i tic pere won, kole meno obedo adec pere. Ŋa m'okel go neno gim'obedi ka go otieko tho?