Read dhopadhola Jafonji 4 Bible Online

Jafonji 4 - dhopadhola bible

Jafonji 4

¹Kenyo awire t'aneno adica je m'itimo i pendi waŋceŋ. Aka neni, pigi waŋ jom'idiyo, m'ongoye ŋat'odiy cuny jo! Kareno joma diyo jo, jonitie gi meni, to ngoye ŋat'odiy cuny jo.

²Kenyo aparo ni joma jotieko tho, jonitie kama ber loyo joma fodi kwo.

³To maber loyo joje no, obedo dhano meno ma fodi k'obedo, meno ma fodi k'oneno tim mareco ma timere i pendi waŋceŋ.

⁴Abino aneno ni kisi olo gi ndijo je ma tic, wok i dhano mako nyeko gi nyawote. Me bende obedo pilok gi riemo koyo.

⁵Jamiŋo dolo cinge, to miyo delkwoŋe litho.

⁶Ber cingi jo acel m'oliŋ, loyo cingi jo ario m'opoŋ gi olo, kodi riemo koyo.

⁷Awire kendo, t'aneno pilok i pendi waŋceŋ.

⁸Nitie ji ma jobedo kendi jo, ma jongoye gi wot jo kosa wutmin jo, kucel ongoye rijo gike ma olo pajo je, aka waŋ jo bende kiyeŋ gi ŋaŋo. Jopenjere ni, “Aol ri ŋa, ma an won akisiemere?” Me bende obedo pilok gi tic i teko.

⁹J'ario joloyo ŋat'acel, kwoŋbedo jonitie gi kemba maber ri olo pajo.

¹⁰Kole k'acel opodho piny, acel latiŋo nyawote, to kidamba ri ŋata nitie kende, ka go opodho ongoye nyawote m'otiŋ go malo.

¹¹Bende ka j'ario jonindo kanyacel, jobedo malieth, to ŋat'acel bende nyalo nedi bedo malieth kende?

¹²Dhano nyalo loyo ŋata nitie kende gi meni, to j'ario jolaciro ŋato. Uzi m'omin didek kicoti piyo.

¹³Soye ma jacandi mariek, ber loyo kere m'oti to miŋ, ma kilatero rieko m'imiyo go kendo.

¹⁴Ŋatimoro adieri nyalo wok i katwec to bedo kere, makada nende onywole jacandi i ker?

¹⁵Aneno jomakwo je ma jowotho i pendi waŋceŋ, t'aniaŋ ni nitie soye i dier jo ma lalunjo kere.

¹⁶Ongoye gike ri ji je kiri ri jono ma jopen rijo. Kucel jono ma jobin rumacen jok'ofore i go. Adieri me bende obedo pilok gi riemo koyo.