Read dhopadhola Jafonji 5 Bible Online

Jafonji 5 - dhopadhola bible

Jafonji 5

¹Gwok tiendin k'ikidho i Ot pa Were. Corok cegin winjo ber loyo cowirok ma jomamiŋ jomiyo, jokipar kada ni jotimo gimarac.

²Ikir'ikwakere gi dhokin, kosa ikir'ikwakere i cunyin tuco wac ruwaŋ Were, kole Were nitie i polo, aka in initie i piny; riameno weyi wac perin wobedi manok.

³Kole lek bino wok i mindin kweth, dwondi ŋatamiŋ wok wac kweth.

⁴Ameno k'itimo cikirok ri Were, ikir'igali gi timo, kole go kiwinji maber gi jomamiŋ. Tim gim'iciko.

⁵Bedo m'ikitimo cikirok ber loyo k'iciko t'iweyo m'ikitimo.

⁶Ikir'iyey dhokin womiy delkwoŋin wotim reco, aka iwaci ruwaŋ jamikwenda ni oyido obedo gikomo; kosa Were lamako nge gi wac perin, to reyo woko tic ma cingin.

⁷Kole ka lek thoth wac nono bedo mathoth, to lwor Were.

⁸Ikir'ibedi gi dhier k'ineno idiyo jacandi, aka iwiro tiro gi gim'otire iy'adec. Kole kisi jatel nigi jatel malo pere ma dhumo go, aka nitie jatel madwoŋ loyo joje.

⁹To i je bero pa kere bedo i lowo m'ofur ndelin mere.

¹⁰Ŋat'omaro feza kilayeŋ gi feza, aka ŋat'omaro lim kilalimo ma romo. Me bende obedo pilok.

¹¹Ka ŋaŋo omedere, jono ma jocamo bende jomedere, aka wegi mere jolimo magowa aŋo kwanyowoko neno gi waŋ jo?

¹²Nindo pa jogoy fut mit, obedi ni jocemo adec kosa i thotho, to thoŋino pa jaŋaŋo kiyey go nindo.

¹³Nitie gimarac ma kiwacere acel m'atieko neno i pendi waŋceŋ. Jaŋaŋo okano lim pere ri litho pere,

¹⁴to ŋaŋo no orwenyo i mitan marac, go onywolo wode, to nwaŋere ni ongoye gi gimoro i cinge.

¹⁵Paka dhano wok i iy min kinyoro, ameno apaka go lagik paka go obino, go k'otiŋ kada gimoro ma olo pere, m'oter i cinge.

¹⁶Me bende obedo gimarac ma kiwacere; paka go obino, ameno apaka go lakadho. Onyo magowa aŋo ma go nitie gine ma go ol ri koyo?

¹⁷Medo kwoŋ meno, hongo pere je go lacemo i mudho, go lamako nge, i two gi mako ŋonge.

¹⁸Me gim'atieko neno ni ber; Obedo gima ŋon aka ma ripo ni dhano wocemi to medho to siemere won ri tic pere i pendi waŋceŋ, i hongo ma kwo macek ma Were omiyo go; kole meno obedo adec pere.

¹⁹Kisi dhano bende ma Were otieko miyo lim gi ŋaŋo, Were bende omiyo go meni ma cemo wok'iye, limo kemba pere, gi bedo gi kisangala i olo pere. Me obedo mic pa Were.

²⁰Kole go k'onyal paro kwoŋ ceko ma kwo pere, kwoŋbedo Were miyo go riwin gi kisangala ma cunye.