Read dhopadhola Jafonji 7 Bible Online

Jafonji 7 - dhopadhola bible

Jafonji 7

¹Nyingi jo maber ber loyo mo ma wir ma welo, aka ndelo ma tho ber loyo ndelo ma nywolirok.

²Ber kidho i ot ma ywak loyo kidho i ot ma kalima; ato me gike pa kisi dhano aka dhano makwo je laketho gime i cunye.

³Rem loyo nyero, kwoŋbedo i kumo ma waŋ jo, cuny sangala.

⁴Cuny jarieko nitie i ot ma ywak, to cuny jamiŋo nitie i ot ma yodirok.

⁵Ber winjo apuse pa jarieko, loyo winjo wer pa jamiŋo.

⁶Kole paka kudhin gwaro pendi ayiga, ameno apaka nyero pa jamiŋo nitie; me bende obedo pilok.

⁷Adieri adica miŋo jarieko, aka cami nyew fuyo cuny jo.

⁸Gike ma gimoro ber loyo cakirok mere, ŋata bedo moth i cuny, ber loyo janoro i cuny.

⁹Ikir'ikwakere mako nge i cunyin, kole nge nindo i pal cuny jomamiŋ.

¹⁰Ikir'iwaci ni, “Raŋo hongo macon ober loyo ma pama?” Kole ikipenjo gime gi rieko.

¹¹Rieko ber paka gir'alunja, aka obedo cwe ri jono ma joneno waŋceŋ.

¹²Kikwonga rieko cal gi kikwonga pesa, aka bero pa ŋeyo obedo ni rieko miyo kwo ri ŋata nitie gine.

¹³Par kwoŋ tic pa Were, ŋa manyalo loko m'otire gim'otieko timo m'oban?

¹⁴I hongo ma gigipiny ber'iye bedi maber, aka i hongo ma gigipiny rac'iye par gime, Were otieko timo gigipiny ma cal, ŋey dhano okir wocaki rango kwoŋ gimoro je ma labino ka go otieko ngoye.

¹⁵Atieko neno kisi gimoro i kwo paran ma pilok, nitie ŋata timo gim'otire ma tho i timo gim'otire, aka nitie jakidakana ma medo kwo i kidakana pere.

¹⁶Ikir'iasa timo gim'otire, aka ikir'iasa bedo mariek, raŋo irey kwo perin?

¹⁷Ikir'iasa bedo jakidakana, aka ikir'ibedi ŋatamiŋ, raŋo itho mafodi hongo perin k'otundo?

¹⁸Ber k'imako gimoro acel, m'ikiweyo man wokadhin, kole ri ŋata lworo Were lakadho maber i je.

¹⁹Rieko timo gimadwoŋ ri jarieko loyo gima jodhum apar jonyalo timo ri tindi madwoŋ.

²⁰Adieri, ongoye dhano i piny m'otire ma timo bero ma kitim reco.

²¹Ikir'iwinji wac je ma ji joluwo, kosa inyalo winjo ka ŋeca perin lamin.

²²Iŋeyo i cunyin hongo m'oromo ma in won bende itieko lamo joman.

²³Gime je atieko temo gi rieko, awaco ni, “Alalokere mariek.” To oyido bor kodan.

²⁴Gim'otieko bedo, nitie bor swa, aka thuth adieri, ŋa manyalo rango tiende?

²⁵Awiro adundo paran ma ŋeyo, kikaŋasa, gi rango rieko, kodi tito paka gigipiny nitie, gi ŋeyo ni obedo miŋo bedo jakidakana aka ni obedo neko bedo jamiŋo.

²⁶Anwaŋo gimakec loyo tho; dhako m'obedo bwo, ma cunye obedo bwo gi twec. Ŋata siemo Were kwale kwoŋe, to mako ŋata timo reco.

²⁷Me a gim'atieko nwaŋo. Jafonji waco, medo gimoro acel i wi acel nwaŋo ni obedo aŋo,

²⁸m'adundo paran otieko rango, to fodi akinwaŋo. Anwaŋo jacwo acel kwoŋ gana acel, t'akinwaŋo dhako kwoŋ jome je.

²⁹Par kwoŋ gime kende, m'atieko nwaŋo, ni Were ocweyo ji ma jotire, to jotieko rango yo kweth.