Read dhopadhola Wer pa Solomon 1 Bible Online

Wer pa Solomon 1 - dhopadhola bible

Wer pa Solomon 1

¹Me wer pa Solomon ma mit loyo.

²Cwiy lemban gi dhokin, kwoŋbedo mar perin loyo ran vini.

³Iŋwe kur, aka nyingin poyan gino. Ongoye dhako ma k'onyalo mitin.

⁴Kadhi kodan, warweny woko, bedi kere paran aka iteran i kisika perin. Walakisangala to wasiemere, weyi wasiemere i mar perin loyo vini, kole am'omiyo mon je jomitin.

⁵Acol ran, t'aŋon, awi nyir ma Yerusalem. Acol paka wemin ma Kedar, t'aŋon paka nangin m'iliero m'igeŋere gine i cel pa Solomon.

⁶Wikiri wiŋisa an kwoŋbedo acol, kwoŋbedo waŋceŋ owaŋo delkwoŋan. Wot mama oyido jomako nge kodan, jomiyan bedo jakur ndelo vini, t'akikuro ndelo vini paran won.

⁷Waci ran, jamitirok paran, kune m'ikway'iye mwendi perin, joywomere kune kwoŋ ceŋ? Raŋo aumere gi kitambala cako rangin, i dier mwendi pa wadin?

⁸K'inen ikuya, nyako maŋon, luw masembo mwendi, aka inwaŋ lum ri diegi perin, cegin gi wemin pa jokwath rombo.

⁹Apima in, jamitirok paran, gi punda i dier punde pa Farawo.

¹⁰Ye wiyin ŋon kiri i pindin, aka podho i tokin paka thiwino.

¹¹To walatimo rin thiwino ma zahabu, m'okedi gi feza.

¹²Kere paran oyido nindo i kanindo pere, aka mo paran opoŋo koyo gi kur mere.

¹³Jamitirok paran nigi ŋwece ma mo akudha, ka go ŋare wi thundho paran.

¹⁴Jamitirok paran cal mawuwa madudi, ma likalika i ndelo vini ma Engedi.

¹⁵A, jamitirok paran, nga iŋon, iŋon, aka waŋin pilin gi mar paka njiwin.

¹⁶A, jamitirok paran, iŋon ba, adieri iŋon! Lum labedo kitanda mawan,

¹⁷yen sida jolabedo wi ot mawan, aka yen maboyo laumo wiye.