Read dhopadhola Wer pa Solomon 4 Bible Online

Wer pa Solomon 4 - dhopadhola bible

Wer pa Solomon 4

¹Iŋon ba, jamitirok paran, iŋon swa, waŋin pilin paka waŋ akuru yuŋey katimba perin. Ye wiyin cal lwodo diegi, ma joloro piny wok wi tendere ma Giliad.

²Lakin tar paka yer rombo, ma nyaka owok lielo t'ilwoko. Ongoye kad'acel m'orem, kisi moro nigi nyawote.

³Dhokin cal wuz m'obokere, aka joŋon k'iluwo. Pindin cal pomo m'obar dirio, jopilin yuŋey katimba perin.

⁴Ŋutin cal acurcur pa Daudi, oŋinere aka foth, gi thiwino ma cal kwote m'oliero thoko.

⁵Thundho perin cal rudina ario, apol ario ma jocemo i dier mawuwa m'ilwoŋo ni lili.

⁶Cuka piny oyawere, to mudho rwenyo, aladoŋ wi got ma buban, gi wi tendere ma mo akudha.

⁷Je fodi iŋon, jamitirok paran, ongoye delkwoŋin kam'ojony.

⁸Biye kodan mweha paran, wok wi gote ma Lebanon, biye kodan wok i Lebanon. Lori piny wok wilwindi ma got Amana, wok wi got Senir gi got Hamon, wok i od simbwore gi kwace.

⁹Itieko ywayo cunyan, nyamin an, mweha paran, iywayo cunyan gi ŋono perin, kodi thiwino m'iruko.

¹⁰Mar perin mit, nyamin an, mweha paran, mar perin ber loyo vini, aka kur mo perin loyo kur je.

¹¹Lewin mit pa mo kic, mweha paran, mo kic gi cak nitie i lewin. Kur perin cal kur ma Lebanon.

¹²Mweha paran, nyamin an cal ndelo m'opanere, ndelo m'ogoy cel kwoŋe, waŋ pi m'ogeti.

¹³Ibedo ndelo pomo, ma nyak olemo mabeyo, gi binzar m'ilwoŋo ni hena, nad,

¹⁴safiron, kalamus gi sinamon, kodi yen ma mo akudha, mo maŋwe kur gi alovera.

¹⁵Ndelo ma pi mol'iye, pi ma kicwiy, waŋ pi ma mol wok i Lebanon.

¹⁶Ay, awi koyo ma yumalo, biye, awi koyo ma yupiny. Kudhi i ndelo paran, ŋey kur mere woywore i koyo. Weyi jamitirok paran wobin i ndelo, aka wocam olemo mabeyo.