Read dhopadhola Wer pa Solomon 8 Bible Online

Wer pa Solomon 8 - dhopadhola bible

Wer pa Solomon 8

¹Kabedi oyido ibedo omin an, ma yokan am'opido to dhotho. Kabedi arom kodin woko, d'acwiyo lembin to ngoye ŋat'odewo.

²Dinyo atelin t'akelin, i ot pa mama, i kisika ma mama onywolan'iye. Dinyo amiyin vini, pigi pomo paran.

³Cingin maracam otheno wiyan, aka cingin maracuc otwodan.

⁴Cikan win, nyir ma Yerusalem, ni wik'oriwere i mitirok mawan.

⁵Meno ŋa ma bino wok i thim, m'othenere kwoŋ jamitirok pere? Acewin i tiendi yath apo, kama ŋedi oram'iye yokin to nywol kenyo.

⁶Kethan kacunyin, aka ikir'imaki ŋatiman i cingin kwanyo woko an. Kole mitirok tek paka tho, aka candirok ger paka bur ma yik. Mitirok liel paka mac, aka waŋ paka mac m'odheth.

⁷Pi kweth kinyal kweyo mitirok, kosa mikula kinyal munyere gine. Ka moro otemo nyewo mitirok, gi lim pere je ma ot, dinyo olimo nyaka cay.

⁸Wanigi nyamin wan mathin, to thundho pere fodi k'ogulo. Wanotim aŋo ri nyamin wan, i ndelo ma jacwo obin weco gine.

⁹Kabedi go obedo kor ot, di wageto rigo acurcur ma feza. To ka go obedo dhiot, walatimo rigo thigo gi yen sida.

¹⁰An abedo kor ot, aka thundho paran jobedo acurcur mere, kenyo aneno ruwaŋ go, paka ŋata kelo siem.

¹¹Solomon oyido nigi ndelo vini i Bal Hamon, aka oketho i cingi jokur, aka kisi dhano oyido ripo culo nusu feza gana acel ma nyinge.

¹²Ndelo vini paran, obedo aparan won, aka ri an won, in, Solomon, inyalo tero feza gana no, aka jokur olemo jowonwaŋ miya ario, to an anigi ndelo vini paran won.

¹³In m'ibedo i ndelin, merin paran jowinjo dwondin, weyi awinji k'iluwo.

¹⁴Kwakere, jamitirok paran, paka rudina kosa paka nyathi apol wi got kama yen maŋwe kur dong'iye.