Read dhopadhola Isaya 11 Bible Online

Isaya 11 - dhopadhola bible

Isaya 11

¹Yath lakitula wok i kolo pa Yese, aka jangi yath lakitula wok i fuc mere.

²Cuny pa Rwoth lapie kwoŋ go, cuny ma rieko gi niaŋ, cuny ma mic rieko gi meni, cuny ma ŋeyo gi lworo Rwoth.

³Kisangala pere labedo i lworo Were, Go kilathumo banja gi gima waŋ go neno, kosa gi gima ithi go winjo;

⁴to gi tiro go lathumo banja ri jocandi, to yero gir'atima marom ri jomamwol i piny. Go lamiyo piny gir'acula gi luth ma nyweny ma dhoke, aka laneko jokidakana gi luya ma dhoke.

⁵Tiro labedo del ma piere, aka genirok labedo del ma piere.

⁶Arara labedo kanyacel gi nyathi rombo, kwac lanindo piny kanyacel gi nyathi diel. Nyathi dhiaŋ gi simbwor jolacemo kanyacel, aka nyathi maŋic lakwayo jo.

⁷Dhok g'arara jolacemo kanyacel, nyithindhi jo jolanindo piny kanyacel, aka simbwor lacamo lum paka dhiaŋ.

⁸Nyathi ma dhoth latuko i kero malasaŋ, nyathi m'oweyo dhoth larwako cinge i od uu.

⁹Jok'omiy litho kosa rerok wi got maleŋ paran je. Piny lapoŋ ŋeyo Rwoth paka pi umo nam.

¹⁰I ndelo no kolo pa Yese lacungo paka ranyuth ri Nonin. Nonin joladwaro go, aka kabedo pere labedo ma didwoŋ.

¹¹I ndelo no Rwoth lacoro cinge kendo madirio dwoko peco ji pere ma joboth, wok i Asiria gi Misir, wok i Pathiros, wok i Ethopiya, wok i Elam, wok i Babilon, wok i Hamath, gi wok i kigoda ma nam.

¹²Go latiŋo ranyuth ri nonin aka lacoko Joisiraili ma jodamba, gi ji ma Yuda ma jokedhere, wok i sonda aŋwen ma piny.

¹³Nyeko pa Efrayim larumo, aka jono ma jotero Yuda gi gwayo ilakwanyo woko, Efrayim kilamako nyeko gi Yuda, aka Yuda kilatero Efrayim gi gwayo.

¹⁴To jolamonjo Filistia yupodho ceŋ, jolakinyaga ji kanyacel yuwok ceŋ. Joladhumo ji ma Edom gi Mowab aka ji ma Amon jolawinjo jo.

¹⁵Aka Rwoth lareyo kicutho jangi nam ma Misir; go latiŋo cinge i wi malawa Yufrete, gi koyo pere malieth, to poko i jange abirio, ŋey ji jowoŋadi atiendi.

¹⁶Ameno royo layawere wok i Asiria, ri ji pere ma joboth, paka obedo ri Isiraili, i ndelo ma jowok'iye i piny ma Misir.