Read dhopadhola Isaya 14 Bible Online

Isaya 14 - dhopadhola bible

Isaya 14

¹To Rwoth latimo wor gi Yakobo to yero Isiraili kendo, laketho jo i lowo pajo wegi; aka jopath jolabino bedo gi jo to joriwere gi ot pa Yakobo.

²Nonin jolakelo jo i kabedo pajo, aka ot pa Isiraili latero jo i lowo pa Rwoth paka ŋecin ma cwo gi ma mon. Isiraili lamako jono ma cango jomako jo, aka ladhumo jono ma cango jodiyo jo.

³Ka Rwoth otiek miyo Joisiraili ywomirok kwoŋ litho gi candirok, gi tic matek m'oyido iromo jo timo,

⁴jolaoro ageca me ma ŋalo kere ma Babilon: Jadic orumo nedi! Mbaka oloyo jagero nedi!

⁵Rwoth oturo luth pa jokidakana, luth ma dhum pa jodhum,

⁶ma jofodo piny ji i keme, gi goco makirum, m'odhumo piny i nge gi candirok makirum.

⁷Piny gibe oywomere aka oliŋ, jomwoc gi wer.

⁸Yen lwiyo jofore kwoŋin, yen sida ma Lebanon, ka jowaco ni, “Wok cuka oredhin piny, ongoye jakiranda mbawo ma bino kwoŋ wan.”

⁹Piny pa jom'otho oyikere jolin, romo kodin k'ibino; sigila tipo pa jom'otho rin, cewo jono je m'oyido jobedo jotel ma piny; wok i kombere pajo ma dhum.

¹⁰Joje jolaluwo, aka jolawaco rin ni, “Itieko lokere manyap paka wan! Itieko lokere paka wan!”

¹¹Dwoŋ perin odwoki i piny pa jom'otho, gi dwondi wer ma tongol perin. Kudin jolak kwoŋin, aka njoka joumin.

¹²Ipodho nedi wok i polo, Awi micala m'odieceŋ, wod ŋamba! Otoŋin nedi kiri piny, in m'oyido iredho piny nonin!

¹³Iwaco i cunyin ni, “Alaidho i polo, alatiŋo malo kom paran ma dhum, kalo micalin pa Were; alabedo wi got ma romo, bor swa yumalo.

¹⁴Alaidho malo i wi pondeponde, alacale Jamalo Loyo.”

¹⁵To oredhin i piny pa jom'otho, i lutho ma bur.

¹⁶Jono ma jonenin jolakiŋisa in, aka jolapenjere ni, “Me won a jacwo m'omiyo piny kirin, m'oyengo kerin,

¹⁷m'oloko piny paka thim, to reyo woko tindin madongo, aka k'oyeyo jotwec pere dok peco?”

¹⁸Kerin pa nonin je jonindo i dwoŋ, kisi dhano i kaliel pere,

¹⁹to obolin woko, bor gi kaliel perin, paka jangi yath, iumere gi delkwoŋ jolweny m'oneki i lweny, ma jodonjo i telin ma bur, paka delkwoŋ ŋat'otho m'onyon gi tiendi jo.

²⁰Ikilariwere gi jo i yikirok, kwoŋbedo itieko reyo woko lowo perin, ineko ji perin won. Weyi nyikway joreco, wokiri wocwoki nyingi jo kendo!

²¹Yikere win thumo wot kere, ro reco pa kwarere pajo, ŋey jokiri jowoay, kosa dhumo piny, to joumo piny gi tindin madongo.

²²Rwoth pa lwak jolweny waco ni, “Alaay kwoŋ jo, aka alakwanyo woko kwoŋ Babilon nyinge gi nyithindho je, Rwoth pa lwak jolweny waco.

²³Alaloko kabedo pa kinapupu, gi kidiwin ma pi, aka alayweyo gi ywec ma rerok, Rwoth pa lwak jolweny waco.”

²⁴Rwoth pa lwak jolweny otieko kwoŋirok ni, “Paka atieko yiko, apaka labedo, aka paka atieko cano, apaka latundo i kare.

²⁵Alaturo Joasiria i lowo paran, aka alanyono go gi par tiendan wi gote paran, ilakwanyo woko okol pere kwoŋ jo, gi bieto pere i badi jo.

²⁶Me atoŋa m'atieko cano, ma mako piny gibe, aka me a cingan m'arieyo kwoŋ nonin je.”

²⁷Kole Rwoth pa lwak jolweny otieko cano, aka ŋa ma lakwero? Cinge oriere woko, ŋa ma ladolo?

²⁸I oro ma kere Ahaz oth'iye, mikwenda me obino:

²⁹Wikiri wifore, win Jofilistia je, ni abiro m'ocwado win otur, kole wok i fuc thwol lawok uu, aka olemo mere labedo thwol ma ay gi bwombe.

³⁰Okayo pa jacandi lafono, aka ji ma bukony joriere piny i siem. To alamiyo fuc mewin wotho gi kec, aka ji mewin ma jodoŋ alaneko woko.

³¹Goy ndur, awi waŋkac, ywak, awi tindi madwoŋ, leny i lworo, awi Filistia, wijoje! Kole yiro wok yumalo, aka ongoye jalweny ma labedo kende i dwoŋ pere.

³²Aŋo ma dhano odwoki jomikwenda ma piny? Rwoth otieko nwaŋo Zayon, aka i go ji pere ma jodamba, jolanwaŋo kapondo.