Read dhopadhola Isaya 16 Bible Online

Isaya 16 - dhopadhola bible

Isaya 16

¹Dhiri win nyithindhi rombo bongi jadhum ma piny, wok i Sela, tundo i thim, tundo i got pa nyar Zayon.

²Paka winyin m'oriem wok i od gin jolera, ameno bende apaka nyir ma Mowab jolabedo, i thengi malawa Arnon.

³“Miy rieko, miy tiro, tim tipo perin paka wor odieceŋ par, pan ŋat'odamba, ikir'icam sereko ri ŋat'oriem.

⁴Weyi ji paran ma jodamba jowobedi kodin, Mowab bedi kapondo rijo, kwoŋ jono ma jomito reyo jo.” Jadiy jo gi jarey jo orumo, janyon ji gi tiende orumo i piny,

⁵kenyo ilaketho kom ma jadhum i mar makiwire wok i wema pa Daudi, aka i wiye labedo iy'adieri, jathum banja ma rango tiro, aka yil ma timo gim'otire.

⁶Watieko winjo noro pa Mowab, nger ma go nor'iye! Gero pere, noro pere gi pakirok pere; delok pere je nono.

⁷Riameno weyi Mowab wogoy lelo, kole Mowab gibe lagoyo ndur. Ywak win cuka wilacere kicutho, ri cemo maber ma Kir Hareseth.

⁸Kole ndelin ma Hesbon jothwo, gi yen vini ma Sibima. Jodhum ma piny, jotieko rwadho piny nyingi vini maber loyo, m'otundo kiri i Jaza, jolera i thim, withe mere oloth to yare kalo wi nam.

⁹Riameno aywak paka Jaza, ri yen vini ma Sibima. Aladhiekin gi pigi waŋan, awi Hesbon gi Eliale, kole koko mar'olemo perin gi keco perin, otieko podho.

¹⁰Ilakwanyo woko kisangala gi forok, wok i ndelo olemo, gi wok i ndelin vini. Ongoye wer gi koko kendo, kama idhiŋ'iye nyingi vini. Atieko juko koko.

¹¹Riameno adundo paran gore paka dingidi ri Mowab, gi cunyan ri Kir Heres.

¹²Ka Mowab obin, to ol i kitipa pa jom'oyeyo, ka go obin i Kabedo Maleŋ kwayo, go k'onyal.

¹³Me wac ma Rwoth oluwo kwoŋ Mowab cango.

¹⁴To onyo Rwoth waco ni, “I oro adek, paka jatic m'opangisa, dwoŋ pa Mowab ilaloko cay, makada nende jothoth, aka ma joboth jolabedo manok kareno joloc.”