Read dhopadhola Isaya 19 Bible Online

Isaya 19 - dhopadhola bible

Isaya 19

¹Me mikwenda ma teko ma mako kwoŋ Misir. Neni, Rwoth gweco i pondeponde masew, aka bino i Misir; cal je ma Misir jolakirin ruwaŋ go, aka cuny Jomisir lapodho i jo.

²Alakisigila Jomisir kwoŋ jo wegi gi wegi, aka jolalweny, acel gi nyawote, jager gi jager, tindi madwoŋ gi tindi madwoŋ, ker gi ker.

³Jomisir jolangoye gi meni, ka anonywow can pajo. Jolatemo nwaŋo rieko, wok bongi cal pajo je, wok bongi tipo pa jom'otho, gi wok bongi jothieth.

⁴Alamiyo Jomisir i cingi jadwoŋ matek, kere mager ladhumo jo, Rwoth pa lwak jolweny waco.

⁵Pi ma Nayil lacwiyo woko, aka malawa lacwiyo to thwo.

⁶Waŋ pi mere laŋwe, waŋ pi ma Misir lacwiyo, aka midole gi lum maboyo, jolathwo woko.

⁷Midolin ma Nayil gi ma thengi Nayil, kisi ndelin ma Nayil m'ocwoy'iye, laduny woko, to ngoye man.

⁸Jokitoga rec jolaywak, jono je ma jobolo siragetere i Nayil jolakumo, aka jono ma joyaro bwo wi pi mbaka laloyo jo.

⁹Jokwoc nangin gi jotudi nangin mafoth, jolabedo giwickwot.

¹⁰Jono ma jobedo sirin ma piny ilaŋidho jo, aka jono je ma jotimo tic ma cul m'ipangisa jo jolabedo i rem.

¹¹Jodhum ma Zowan jomiŋ swa, jomic rieko pa Farawo ma joriek jomiyo rieko ma miŋo. Winyalo nedi waco ri Farawo ni, “Abedo wod jorieko, wod kerin macene?”

¹²Onyo nikune cwo perin ma joriek? Weyi jowowaci rin aka jowomiy woŋey, atoŋa pa Rwoth pa lwak jolweny kwoŋ Misir.

¹³Jodhum ma Zowan jotieko lokere jomamiŋ, aka otiek wondo jodhum ma Memfis. Jono ma jobedo telin ma sonda ma nonin pere, jotieko rwenyo woko Misir.

¹⁴Rwoth otieko konjo kwoŋ jo, cuny ma nywowirok, aka jomiyo Misir kimudamuda i gima timo je, paka jamero tangatanga i ŋok pere.

¹⁵Aka langoye gimoro ri Misir, ma wic kosa yiwe, jangi thith, kosa kedi onyali timo.

¹⁶I ndelo no Jomisir jolacale mon, to jokirin gi lworo ruwaŋ cingi jo ma Rwoth pa lwak jolweny yengo i wiy jo.

¹⁷Lowo ma Yuda lalokere lworo madwoŋ ri ji ma Misir, kisi ŋat'otuc rigo nyingi Yuda labedo gi lworo r'atoŋa pa Rwoth pa lwak jolweny kwoŋ Misir.

¹⁸I ndelo no labedo tindin madongo abic i lowo ma Misir ma joluwo dhodhok ma Kanan aka jolakwoŋere i nyingi Rwoth pa lwak jolweny. Acel kwoŋ jo ilalwoŋo ni Tindi madwoŋ ma Waŋceŋ.

¹⁹I ndelo no migam labedo ri Rwoth i dier lowo ma Misir, gi siro ri Rwoth i kew ma Misir.

²⁰Aka labedo ranyuth gi mijulisi ri Rwoth pa lwak jolweny i piny ma Misir, ka joywak ri Rwoth ro jor'adica, go laoro rijo jaboth, ma lagwoko to gonyo jo.

²¹Rwoth lanyuthere to ŋeyere ri Jomisir, aka Jomisir jolaŋeyo Rwoth i ndelo no. Jolalamo go gi cowirok gi mic awaŋa, aka jolatimo cikirok ri Rwoth to joculo.

²²Rwoth lamiyo Misir gir'acula, to rumacen cango jo. Jolagik bongi Rwoth, aka go lawinjo kwayo pajo to cango jo.

²³I ndelo no labedo royo madwoŋ wok i Misir tundo i Asiria, aka Joasiria jolabino i Misir, Jomisir bende jolakidho i Asiria, aka Jomisir jolalamo kanyacel gi Joasiria.

²⁴I ndelo no Isiraili labedo mar'adek gi Misir kodi Asiria, silwany i dier piny,

²⁵ma Rwoth pa lwak jolweny omiyo silwany ka waco ama: “Silwany wobedi ri ji paran ma Misir, Asiria tic ma cingan, kodi Isiraili alunja paran.”