Read dhopadhola Isaya 2 Bible Online

Isaya 2 - dhopadhola bible

Isaya 2

¹Wac ma Isaya wod Amoz oneno ma mako kwoŋ Yuda gi Yerusalem.

²Aka latundo i kare i ndelo ma rumacen, got ma Ot pa Rwoth, ilaketho wi gote, ilatiŋo malo kalo tendere je. Nonin je jolamol'iye.

³Nonin kweth jolabino to jowaco ni, “Biye, weyi wakadhi win malo wi got pa Rwoth, i Ot pa Were pa Yakobo; ŋey go wofonji wan royo pere aka ŋey wawothi i yo pere. Kole fonji pa Rwoth wok i Zayon aka wac pa Rwoth wok i Yerusalem.”

⁴Go lathumo banja i dier nonin, aka lakiosa ri ji kweth. Jolathedho abor pajo wolokere kwe dhok ma fur, aka tonge pajo wolokere apala nyangoda. Ongoye nono ma latiŋo abor kwoŋ nono man kendo, kosa fonjere lweny kendo.

⁵Awi ot pa Yakobo, biye, weyi wawothi, i lero pa Rwoth!

⁶Kole iweyo yo pa ji perin, ot pa Yakobo. Adieri jopoŋ gi jothieth wok yuwok ceŋ, gi jojwok paka i Filistia, aka joriwo cingi jo gi nyithindho pa jopath.

⁷Lowo pajo opoŋ gi feza gi zahabu, aka lim pajo ongoye gike. Lowo pajo opoŋ gi kayinin, aka cawilin pajo ongoye gike.

⁸Lowo pajo opoŋ gi cal, jokule piny ri tic ma cingi jo, ri gima lwet cingi jo won am'otimo.

⁹Ameno dhano mwole, aka kisi dhano dwokere piny, ikir'icwaki rijo!

¹⁰Donji i tele, kosa pondi i fukefuke, kwoŋ nge pa Rwoth, kwoŋ dwoŋ ma dhum pere.

¹¹Waŋ ji ma pakirok iladwoko piny, aka delok pa kisi dhano ilamwolo aka Rwoth kende am'ila tiŋo malo i ndelo no.

¹²Kole Rwoth pa lwak jolweny nigi ndelo, kwoŋ jodelok je gi jopakirok, gi kwoŋ kisi dhano ma janoro, aka iladwoko go piny.

¹³Kwoŋ yen sida je ma Lebanon, maboyo aka otiŋere malo, gi kwoŋ olwa je ma Basan;

¹⁴kwoŋ gote je maboyo, gi kwoŋ tendere je m'otiŋere malo,

¹⁵kwoŋ acurcur je maboyo, gi kwoŋ kor udi m'ogeŋ je,

¹⁶kwoŋ mel je ma Tarsis, gi kwoŋ gi ndijo je.

¹⁷Pakirok pa ji ilamwolo, aka delok pa kisi dhano iladwoko piny aka Rwoth kende am'ila tiŋo malo i ndelo no.

¹⁸Cal je jolarwenyo kicutho.

¹⁹Ji joladonjo i ŋungu telin, gi i kero piny, ri lworo pa Were, ri dwoŋ ma dhum pere, ka go oay miyo piny kirin.

²⁰I ndelo no ji jolabolo woko cal pajo ma feza, gi cal pajo ma zahabu, ma jotimo rijo wegi lamo, ri fuko gi kilafundo.

²¹Ji joladonjo i ŋungu telin, gi i wilwindi riete, kwoŋ lworo pa Rwoth, gi dwoŋ ma dhum pere, ka go oay miyo piny kirin.

²²Wire woko kwoŋ dhano, ma luya pere nitie i ume, aŋo bende ma go nyalo?