Read dhopadhola Isaya 23 Bible Online

Isaya 23 - dhopadhola bible

Isaya 23

¹Me mikwenda ma mako kwoŋ Tire. Ywak, Awi mel ma Tarsis, kole orey woko Tire kicutho, m'ongoye ot kosa kadonjo. Jobino wok i lowo ma Saipras munyo onyuthi jo.

²Liŋ win, awi ji ma jobedo i thengi nam, awi jomitan ma Sidon, jomikwenda mewin joŋado nam,

³aka oyido jonitie wi pi kweth, dome mewin oyido obedo ŋano ma Sihor, gi keco ma Nayil, oyido wibedo jomitan pa nonin.

⁴Wickwot omaki win, awi Sidon, kapondo ma Nam waco. Fodi ŋedi k'oraman, kosa anywol, fodi akikuro yac, kosa nyir ma fodi jokuya cwo.

⁵K'okow ri Misir, jolabwok to jodhier kwoŋ wac ma mako kwoŋ Tire.

⁶Por win loka ma Tarsis, wiywak win ji ma wibedo i thengi nam.

⁷Me a tindi mewin madwoŋ ma dikisangala? Tindi m'ocaki cango con, ma par tiende otiŋo wok bor, kadho woth.

⁸Ŋa m'ocano gime, kwoŋ Tire, japok sangaria, ma jomitan pere jobedo jodhum, aka iworo jo i piny gibe?

⁹Obedo atoŋa pa Rwoth pa lwak jolweny, nyeko kwoto ma ŋono je, kelo cay kwoŋ jom'iworo je i piny.

¹⁰Mol i lowo perin paka Nayil, awi nyar Tarsis; ongoye rageŋ moro je kendo.

¹¹Rwoth orieyo cinge i wi nam go otieko miyo kerin kirin. Rwoth owodho or ma mako kwoŋ Kanan reyo woko kapondo mere.

¹²Rwoth owaco ama, Ikilakisangala kendo, Awi nyir ma fodi jokuya cwo, ma Sidon m'idiyo jo; Ay, Saipras, ikali loka ca, kiri koro wikilanwaŋo ywomirok.

¹³Neni, lowo pa Jokaldin! Obedo ji me, makiweno Asiria. Joloko Tire kabedo p'ogwaŋe madudi. Jogeto acurcur ma thoko go mako, joreyo woko muluwir mere to josika woko go.

¹⁴Ywak, awi mel ma Tarsis, kole kapondo perin orey woko.

¹⁵Wok i ndelo no, kilapoyo Tire kendo ma oro piero ario, paka ndelin pa kere acel. Ka oro no orum, latimere ri Tire paka nitie i wer pa malaya me.

¹⁶Kwany tongol, woth thoko tindi madwoŋ, in malaya ma kipoy kendo! Diy dwondin mamit, wer wer kweth, ŋey wonyali poyin.

¹⁷I gike ma oro piero ario, Rwoth lawendo ri Tire, aka Tire lagik i mitan pere kendo, aka latimo malaya gi kerin je ma piny.

¹⁸Magowa pere gi cul pere ilamiyo ri Rwoth, kilakano, t'ilaoro ma miyo cemo gi nangin ri ji ma jobedo ruwaŋ Rwoth.