Read dhopadhola Isaya 26 Bible Online

Isaya 26 - dhopadhola bible

Isaya 26

¹Ilawero wer me i ndelo no i lowo ma Yuda. Wanigi tindi madwoŋ matek, Were otieko kelo both, paka kor ot ma iye gi kor ot ma woko.

²Yaw waŋkace, ŋey piny ma timo gim'otire, aka kuro adieri wodonji.

³Rwoth, ikuro go i siem ma gibe, ri ŋata ketho paro i in, kwoŋbedo oketho geno pere i in.

⁴Kethi geno i Rwoth cil gi cil, kole Rwoth Were, obedo tele ma cil gi cil.

⁵Kole Rwoth odwoko piny, ji ma jobedo i kabedo ma malo, tindi madwoŋ m'ogeti m'oŋawere, cuka geyo fukefuke.

⁶Onyo jocandi gi ji ma bu gimoro, ama jonyono woko piny.

⁷Royo pa joma timo gim'otire obipi, iŋat'iloko royo pajo mafoth.

⁸Watieko kuro yo ma thumo banja perin, wakurin, Awi Rwoth, poyo nyingin, a mito ma cuny wan.

⁹An won awanya in wor gipi, cunyan i an koro dwarin adieri. Kole ka thumo banja perin nitie i piny, ji ma jobedo i piny jofonjere timo gim'otire.

¹⁰K'onyuthi jokidakana wor, jokilafonjere timo gim'otire. I lowo pa joma timo gim'otire, go timo komo, aka kinen meni pa Rwoth ma dhum.

¹¹Awi Rwoth, cingin otiŋere malo, to jokinen. Weyi jowoneni miyirok perin ri ji perin, aka wickwot womaki jo. Weyi mac pa jokwor perin worey woko jo.

¹²Awi Rwoth, ilamiyo wan siem, kole bende, itieko timo riwan tic mawan je.

¹³Awi Rwoth Were mawan, rwodhe man bende jotieko dhumo wan paka in, to, nyingin kende ama walwoŋo.

¹⁴Jotho, jokilakwo, jobedo tipo, jokilacerino; i gike mere itieko reyo woko jo, iyweyo woko poyirok pajo.

¹⁵To itieko miyo nono mawan omedere Awi Rwoth, itieko medo nono, ilimo dwoŋ, itieko loko malac kew je ma lowo.

¹⁶Awi Rwoth, i teko ji jorangin, jokwayo, munyo imiyo jo gir'acula.

¹⁷Paka dhako ma nigi iye, core cegin i hongo pere ma nywol, go ywak i litho ka ŋedi ramo, ameno apaka oyido wanitie ro in, Awi Rwoth.

¹⁸Wabedo gi iy wan, to cale pa wanywolo koyo. Wakicowo konyo piny, aka ji ma jobedo i piny jok'opodho.

¹⁹Ji perin ma jotho jolakwo, delkwoŋ jolacerino. Awi ji ma jonindo i fukefuke, cew win aka wiwer ro kisangala! Kole thoyo mewin obedo thoyo ma lero, aka piny laŋulo jom'otho.

²⁰Biye win, ji paran donji win i udi mewin, aka wicegi thigo mewin yuŋey win; pondi win ma hongo moro, cuka keme pa Rwoth orum.

²¹Kole Rwoth bino wok i kabedo pere, miyo ji ma piny gir'acula ro reco pajo, piny laŋulo remo m'ooy i iye, aka kilaumo kendo jom'onek jo.