Read dhopadhola Isaya 27 Bible Online

Isaya 27 - dhopadhola bible

Isaya 27

¹I ndelo no Rwoth lathumo banja ri Leviathan thwol ma ringo, Leviathan thwol ma minere, g'abor mager, madwoŋ, aka matek, aka laneko bulir manitie i nam.

²I ndelo no, wer win kwoŋ ndelo vini ma kisangala!

³An, Rwoth, abedo jakur mere, akonjo rigo pi noknok. Akuro go wor g'odieceŋ, wongoye ŋata wonyeki.

⁴Angoye gi keme, To ka nitie kudhin gi okure, ran lweny gine, alawaŋo woko jo kanyacel.

⁵Kosa jowocwire kwoŋan, akwonga jo, weyi jowotimi siem kodan, weyi jowotimi siem kodan.

⁶I ndelo ma bino, nyikway Yakobo jolarwako fuc, Isiraili lathiwo to ketho withe, aka lapoŋo piny gibe g'olemo.

⁷Go otieko rwadho jo piny paka orwadho piny jono ma jorwadho jo? Kosa oneko jo paka oneki joma joneko jo?

⁸Gi gweyo woko, gi riemo woko, ilakiosa banja gine, go ogweyo woko gi koyo malieth, i ndelo ma koyo ma yuwok ceŋ.

⁹Riameno, gi gime ilaumo reco pa Yakobo, me labedo ranyak m'opoŋ ma kwanyo woko reco pere, ka go oloko telin je ma migam, paka coka m'oŋiny mathindho thindho, m'ongoye migam pa were madhako Asera kosa ma buban m'odoŋ.

¹⁰Tindi madwoŋ m'othok gi cel odoŋ gunda, aka ojwangi paka thim; nyathi dhiaŋ cemo kenyo, nindo piny, aka jako jange mere.

¹¹Ka jangi yen jothwo, ituro, mon jobino dimo aka jomoko gine mac. Kole me ji ma jongoye gi niaŋ, riameno jacwec pajo kilamako gi jo wor, go m'ocweyo jo k'onyutho jo ŋono.

¹²I ndelo no, Rwoth layeko win wok i Yufrete tundo i kew ma Misir, aka ilacoko win kanyacel acel acele, awi Joisiraili.

¹³I ndelo no, ilakudho gwara madwoŋ, aka jono m'oyido jorwenyo i lowo ma Asiria kodi jono m'oyido oriem jo woko i lowo ma Misir jolabino lamo Rwoth wi got maleŋ i Yerusalem.