Read dhopadhola Isaya 30 Bible Online

Isaya 30 - dhopadhola bible

Isaya 30

¹Kidamba ri nyithindho ma jogwenyere, Rwoth waco, ma jotimo can ma k'obedo aparan, ma jotimo cikirok, to k'owoki bongi cuny paran, medo reco i wi reco.

²Jomiyere kadho piny i Misir, m'ongoye penjo rieko paran, jopondo i Misir ni Farawo wokwonga jo, aka jorango kabwok i tipo pa Misir.

³Riameno kikwonga pa Farawo labedo wickwot riwin, aka kabwok i tipo ma Misir labedo teko riwin.

⁴Makada nende jodhum pere jonitie i Zowan, aka jomikwenda pere jotundo i Hanes,

⁵kisi dhano je wiye kwot, luwo i ji ma jongoye rijo cwe, ma jokikel kony kosa cwe, to wickwot kodi amien.

⁶Me mikwenda ma mako kwoŋ ogwaŋe ma yupiny ma Kanan. Luwo i lowo ma teko gi litho, wok kwoŋ simbwor gi simbwor madhako, malasaŋ kodi thwol ma ay gi bwombe, jotiŋo lim i wi punde kodi ŋamia, tero ri ji ma jongoye rijo gi cwe.

⁷Kole kony pa Misir bukony aka nono. Riameno atieko miyo nyinge ni, “Rahab ma bedo liŋ.”

⁸Rwoth owaco ran ni, Kadhi pama, indiki ruwaŋ jo i tele mapando, indiki i kitawo, ŋey wobedi kiri i hongo ma bino ma cil gi cil.

⁹Kole jobedo ji ma jogwenyere, nyithindho ma jotwodo, nyithindho ma jokiwinji, cik pa Rwoth;

¹⁰ma jowaco ri joneno ni, “Wikiri winen.” Gi ri jotuci wac Were ni, “Wikiri wiwaci riwan gim'otire. Luw win gi wan gima foth, tuci win twodo,

¹¹eye win i royo, leŋ win i yo, wakimiti winjo kendo gima mako kwoŋ Were Maleŋ pa Isiraili.”

¹²Riameno Were maleŋ pa Isiraili waco ama: Kwoŋbedo witieko kwero wac me, aka witieko ketho geno iy'akaka gi twodo, aka wigoŋere kwoŋe.

¹³Riameno reco me lacale riwin, paka barok i kor ot mabor, m'oleŋere aka cegin podho, ma barok mere bino abwap, ma piyo.

¹⁴Tur mere cale paka dak m'ocwey gi lowo, ma ŋinyere marac, to ngoye thago ma nwaŋere, kada ma toko cuk mac wok i kendo, kosa ma twomo pi wok i bur.

¹⁵Kole Rwoth Were, Were Maleŋ pa Isiraili otieko waco ama: I dwoko bongan wilalimo ywomirok gi both, liŋ gi geno labedo meni mewin, to wikiyeyo.

¹⁶To wiwaco ni, Be! Walakwale i wi kayina; riameno wilakwale i wi kayina. To jono ma joriemo win, jolabedo kiri mayil loyo.

¹⁷Ji gana kwoŋ win jolaringo k'acel obwok win, wilaringo k'abic jobwok win, cuka winodoŋ, paka luth ma bendera wi got, paka ranyuth i wi tendere.

¹⁸Riameno Rwoth kuro nyutho win wor; go laay malo nyutho win wor. Kole Rwoth obedo Were ma timo tiro, josilwany a jono je ma jokuro go.

¹⁹Adieri, awi ji ma Zayon, ma jobedo i Yerusalem, wikilaywak kendo. Adieri Rwoth lanyutho win wor i derino ma ywak mewin, ka go owinji, go ladwoko win.

²⁰Makada nende Rwoth omiy win mugat ma litho gi pi makec, kucel kilakwanyo woko jofonjere mewin kendo, to waŋ win laneno jo.

²¹Ka winowire racuc kosa racam, ithi win lawinjo wac yuŋey win ka waco ni, “Me a yo; woth win i iye.”

²²Kenyo wilakwanyo cal mewin m'oum gi feza kodi zahabu to wibolo woko paka oselo ma dhako oro ka ruko dwe, aka wilawaco ni, “Wikoci.”

²³Rwoth lamiyo koth ri kodhi ma wicwoyo i lowo, kodi ŋano, aka cemo lanyak m'owega. I ndelo no ogwaŋe mewin jolabedo gi lum kweth.

²⁴Megikwe gi punde ma jofuro ndelin mewin jolacamo cemo dhok ma di cumbi m'otiek piedho.

²⁵Malawin kodi waŋ pi jolakitula wok i wi kisi got kodi tendere, i ndelo ma thumirok madwoŋ ka acurcur opodhi.

²⁶Dwe laliel paka waŋceŋ, aka waŋceŋ laliel dibirio loyo paka liel, paka ceŋ ma ndelo ario i ndelo acel, i ndelo ma Rwoth otwey to cango adhola m'omiyo ji pere gi goco pere.

²⁷Neni, Rwoth bino wok bor swa, gi nge pere maliel, kodi tome yiro ma ay malo, dhoke opoŋ lam, aka lewe cal mac ma reyo woko jo.

²⁸Ywe pere cal mikula pi, ma mwonyo jo kiri i ŋuti. Go cunga nonin i kicungwo ma bukony, aka tweyo dingi nonin rwenyo woko jo.

²⁹Wilawero paka witimo wor ma kalima maleŋ, aka cuny win lakisangala paka ŋata wotho gi milowe ka kadho wi got pa Rwoth, Tele pa Isiraili.

³⁰Rwoth lamiyo dwoŋ ma dwondi go wowinji, aka ilaneno cinge oloro ma goco, i nge mager kodi mac ma reyo woko jo, gi mwoc koth kodi cwe pe.

³¹Joasiria jolabwok ka jowinji dwondi Rwoth to joneno go ka gore gi luth pere ma nyweny.

³²Kisi ka Rwoth sigila jo gi luth m'oyik, mor paka sasi gi tongol. Go lawito cinge lweny gi jo.

³³Kole otiek yiko kama mac m'odheth lawaŋo kere ma Asiria cango con. Kanyago luth aka lac, aka ocan i iye yen. Rwoth laywe tome mac ma lacwinyo.