Read dhopadhola Isaya 31 Bible Online

Isaya 31 - dhopadhola bible

Isaya 31

¹Kidamba ri jono ma jokadho i Misir rango kony, jogoŋere kwoŋ kayinin, joketho geno i cawilin kwoŋbedo jokweth, kodi jogwey kayinin kwoŋbedo jotek. To jokiŋiy Were Maleŋ pa Isiraili kosa rango Rwoth!

²Kucel Rwoth bende riek aka kelo teko, go kidwoki wac m'oluwo; to, laay malo kwoŋ ot pa joreco, gi jono ma jokonyo joma timo gimarac.

³Jomisir jobedo ji, makiweno Were, kayinin pajo jobedo del, makiweno cuny. Ka Rwoth oriey cinge, jakony lacer, aka ŋat'ikonyo lapodho, aka jolarere kanyacel.

⁴Kole Rwoth otieko waco ran ni, paka simbwor kosa nyathi mere hola kwoŋ cemo pere, aka makada nende jokwath rombo ma jotemo kikwonga rombo jokoki nedi, kibwoki ro koko pajo, kosa bwonere ro woy pajo; ameno apaka Rwoth pa lwak jolweny laloro piny, lweny wi Got Zayon gi i wi tendere mere.

⁵Paka winyo ma ay, ameno apaka Rwoth pa lwak jolweny, lakikwonga Yerusalem, go lakikwonga to gonyo go, go lakoyo to botho go.

⁶Wire win bongi ŋata wicamo rigo sereko, awi Joisiraili.

⁷Kole i ndelo no wilabolo woko cal mewin je ma feza gi zahabu ma cingi win m'opoŋ reco am'otimo riwin.

⁸Asiria lapodho g'abor, makiweno gi meni pa dhano; abor ma dhano ama k'otimo, laneko go. Asiria laringo kwoŋ abor, aka yac pere ilamiyo jo timo tic arom.

⁹Tele pere laringo i lworo, jomituka jolalworo bendera mere, Rwoth waco, go ma mac pere nitie i Zayon, aka go ma mac pere m'odheth nitie i Yerusalem.