Read dhopadhola Isaya 36 Bible Online

Isaya 36 - dhopadhola bible

Isaya 36

¹I oro mar'apar g'aŋwen ma dhum pa kere Hezekia, Senakerib kere ma Asiria omonjo tindin madongo m'otinda ma Yuda to mako.

²Senakerib ooro Rabisake wok Lakis bongi kere Hezekia i Yerusalem, gi jolweny madwoŋ. Go ocungo i yo ma jokwoc nangin jotiy'iye, yu fereji ma kidiwa ma malo i yo ma kadho i ndelo pa jalwok nangin.

³Kenyo jolwoŋo Hezekia, aka jodhum pere adek jokidho romo gi jo. Eliakim wod Hilikia m'oyido jatel ma peco pa kere, Sebina jandiko ma kapido, gi Yowa wod Asaf m'oyido jandiki gima timere je.

⁴Jatel pa jamituka ma Siria owaco rijo ni, “Waci win ri kere Hezekia ni, kere madwoŋ, kere ma Asiria mito ŋeyo gima miyo Hezekia bedo gi miseni ameno.

⁵Iparo ni wac kende nyalo tero kabedo pa gilweny gi meni? Ŋa m'iparo ni bino konyin m'igwenyere kwoŋ Asiria?

⁶Neni, igeno ni kere ma Misir bino konyin, kedi maluth m'otur no, ma bino cwowo cingi ŋata thenere kwoŋe. Ameno apaka Farawo kere ma Misir nitie ri jono ma jogeno go.”

⁷“Kosa winowaci ran ni wigeno Rwoth Were mewin. Obedo sawin pa Rwoth gi migame pere ma Hezekia onyeko, munyo owaco ri ji ma Yuda gi Yerusalem lamo i migam ma Yerusalem kende.

⁸Onyo biye win, wabedi gi piem i nyingi kere ma Asiria. Abino miyo win kayinin gana ario ka winonwaŋ cwo ma romo ma jonyalo gweyo jo!

⁹Wikinyal kiri lweny gi jadhum mathin loyo i Asiria, aka kucel wiparo ni Misir bino dhiro riwin cawilin gi cwo ma jogweyo kayinin!

¹⁰Kole Rwoth won am'okonyan monjo piny mewin. Rwoth won am'owaco ran ni amonji aka arey woko.”

¹¹Kenyo Eliakim, Sebina, gi Yowa jodwoko go ni, “Jadwoŋ, luw gi wan dhoaramayik. Ikir'iluw gi wan dhoebulaniya, kwoŋbedo ji ma kor ot je jowinjo.”

¹²Go odwoko ni, “Wiparo ni kere ooran waco riwin gi kere kende gime? Be, aluwo bende gi ji ma jobedo i kor ot, ma bende jobino camo ceth pajo to jomadho lac pajo, paka win bende.”

¹³Kenyo go oay malo aka okoko i dhoebulaniya ni, “Winji win gima kere madwoŋ, kere ma Asiria waco riwin!

¹⁴Go gwoko win ni wikiri wiyey Hezekia wowondi win. Go kinyal botho win wok i cingan.

¹⁵Aka wikiri wiyey go wodwoŋi win geno Rwoth. Wikiri wipar ni Rwoth bino konyo win, kosa ni go bino juko jolweny mawan ma Asiria mako tindi madwoŋ me.

¹⁶Wikiri wiwinji Hezekia; kole kere ma Asiria waco ni, ‘Tim win siem kodan aka wiwok bongan, kenyo kisi nyatoro lacemo wok i vini pere won, gi nyandere pere, aka kisi nyatoro bino madho pi ma waŋ pi pere won;

¹⁷cuka anobin t'atero win i lowo ma cal lowo mewin, lowo ma ŋano gi vini, lowo ma mugat gi ndelo vini, lowo ma yen oliv gi mo kic, ŋey wikiri witho, to wikwo.

¹⁸Wikiri wiyey Hezekia womiŋi win gi paro ni Rwoth labotho win. Nitie were ma piny moro je m'otieko botho lowo pere wok i cingi kere ma Asiria?

¹⁹Werin ma Hamath gi Aripad jonikune? Werin ma Sefarivayim, Hena, gi Iva jonikune? Jobotho Samaria wok i cingan?

²⁰Keraŋo ma werin ma piny me je jobotho piny pajo wok i cingan, ma Rwoth ripo botho Yerusalem wok i cingan?’”

²¹To ji oyido joliŋ aka jok'odwoko go. Kole kere oyido owodho or ni, “Wikiri widwoki go.”

²²Kenyo Eliakim wod pa Hilikia m'oyido kuro muluwir, gi Sebina jandiko, gi Yowa wod pa Asaf, jandiki gima timere, jobino bongi Hezekia gi nangin pajo m'oyec, to jowaco rigo wac pa Rabisake.