Read dhopadhola Isaya 40 Bible Online

Isaya 40 - dhopadhola bible

Isaya 40

¹Yom, awi yom cuny ji paran, Were perin waco.

²Luw gi mwolo gi Yerusalem, aka ywak rigo, ni go otieko candere m'oromo aka ocwaki reco pere, ni go otieko jolo i cingi Rwoth gir'acula dirio gipi ro reco pere je.

³Dwondi koko i thim: “Yik win yo i thim ri Rwoth, tir win royo madwoŋ i thim ri Were mawan.

⁴Kama luŋ moro je wotiŋ malo, kisi got moro je i tendere wobipi; piny m'ogondere wotir, aka kam'onyany onyany wopiel.

⁵Kenyo dwoŋ pa Rwoth lanyuthere, aka ji je jolaneno go kanyacel, kole dhok Rwoth otieko luwo.”

⁶Dwondi waco ni, “Ywak” T'awaco ni, “Anoywak aŋo” Ji je jobedo lum, aka ŋono pajo cal gi mawuwa ma ndelo.

⁷Lum ner, mawuwa rwenyo cal mere, ka luya pa Rwoth okudho, adieri ji jobedo lum.

⁸Lum ner, mawuwa rwenyo rangi mere; to wac pa Were mawan lakiyindira cil gi cil.

⁹Yerusalem, idhi wi got mabor, jamikwenda ma wac maber ri Zayon tiŋi dwondin malo gi meni. Awi Yerusalem, jamikwenda ma wac maber, tiŋi dwondin malo, ikir'ilwor; wac ri tindin madongo ma Yuda ni, “Were mewin ee!”

¹⁰Neni, Rwoth Were bino gi meni, go bino dhumo gi meni; kemba pere nigi go, aka cul pere nitie ruwaŋe.

¹¹Go lapidho mwendi pere paka jakwath; go lacoko nyithindhi rombo i bade, to tiŋo jo i kore, to leko megi rombo m'odeda.

¹²Ŋa m'otieko kipima pi poŋ cinge, aka opima polo thenge gi thenge, m'ocego fukefuke ma piny i rapim, to pima gote i latir gi tendere i rapim?

¹³Ŋa m'otieko tiro cuny pa Rwoth, kosa paka jamic rieko pere otieko fonjo go?

¹⁴Openjo ŋa gir'atima, aka ŋa m'ofonjo go royo ma tiro? Ŋa m'ofonjo go ŋeyo, to nyutho go royo ma niaŋ?

¹⁵Neni, kiri nonin je jocale gim'othon i baketi, aka ikwano jo paka fukefuke i wi rapim. Neni, go tero kigodin ma pi paka fukefuke m'onuŋere.

¹⁶Lebanon oyido kinyal wodho mo m'oromo, kad'ogwaŋe mere kirom ma mic awaŋa.

¹⁷Nonin je jocale gim'ongoye kony ruwaŋe; go kwano jo paka gima sisiri loyo gim'ongoye gi gima ninono.

¹⁸Onyo inopima Were g'aŋo, kosa cal mene?

¹⁹Cal, jatic ama timo, aka jathedhi nyweny ama umo gi zahabu, to timo rigo lijegere ma feza.

²⁰Nyatoro yero mbawo ober, mbawo ma kitopi paka mic, nyaka to dwaro japac ma jandijo, ma yiko cal makicar ma kinyal podho.

²¹Fodi ikuya? Fodi ikiwinjo? Fodi k'owaci rin wok i cako? Fodi ikiniaŋ wok i misingi ma piny?

²²Obedo go ma bedo kalo malo ma thokirok ma piny, aka ji mere jocale otwoŋo; go ma yaro woko polo paka nanga m'iumo gine dhiot, to yaro jo paka wema ma bed'iye.

²³Go ama loko jodhum gim'ongoye kony, to timo jodhum ma piny paka gim'ongoye kony.

²⁴Ipidho jo m'okele okele, ocwoy jo m'okel okel, ma tiendi jo fodi k'odonji i lowo maber, ka go okudho jo woko, to joner, aka asur sira gi jo malo paka kanja.

²⁵Onyo inopima an gi ŋa, kosa ŋa marom kodan? Ŋataleŋ penjo.

²⁶Tiŋi waŋin malo akinen, ŋa m'ocweyo gime? Go ma wodho woko lwak pajo to kwano jo, lwoŋo joje gi nyingi jo; rupiri go obedo ŋatadwoŋ i meni, meni pere oasere, ongoye kad'acel ma rem.

²⁷Raŋo wiwaco, Awi Yakobo, aka wiluwo, Awi Isiraili ni, “Royo paran opanere kwoŋ Rwoth, aka Were paran kidew kwoŋ gima ripo kodan.”

²⁸Fodi ikiŋeyo? Fodi ikiwinjo? Rwoth obedo Were ma cil gi cil, jacwec ma witum ma piny. Go kiol kosa lacere, niaŋ pere kiŋeyere.

²⁹Go miyo meni ri joma meni oloyo, to miyo meni ri jom'olacere.

³⁰Kiri soye je meni laloyo jo to jolacere, aka yac jolaol to jopodho piny.

³¹To jono ma jokuro Rwoth, meni pajo lalokere manyen, jolaay gi bwombin gin paka aŋo, jolaŋwec to jok'olacere, jolawoth to jok'ool.