Read dhopadhola Isaya 41 Bible Online

Isaya 41 - dhopadhola bible

Isaya 41

¹Cik ithi win wiwinjan, win piny ma yuthengi nam, weyi ji jowoloki meni pajo manyen, weyi jowocore cegin, nyaka jowoluwi, weyi wajoje wacore cegin ri thumo banja.

²Ŋa m'okelo jatur lweny wok yuwok ceŋ, ma nwaŋo loyo i kisi madala, to lwoŋo go i tic pere? Go gonyo nonin je rigo, to nyono kerin je gi par tiende; go loko jo fukefuke g'abor pere, asere pere kedho jo paka kanja ma duny gi weyo.

³Go riemo jo to kadho ma bu teko, ma dwir ma kigey piny gi tiende.

⁴Ŋa m'otimo to miyo gime timirok, lwoŋo lusin wok i cakirok? An, Rwoth, abedo marapena, aka alabedo macowe.

⁵Piny ma yuthengi nam jotieko neno aka jobwok, tum ma piny jokirin, jocore cegin aka jobino.

⁶Kisi acel konyo nyawote, ka waco ri nyawote, “Bedi jamisen!”

⁷Japac miyo jathedhi nyweny miseni, aka ŋata fotho cal makicar gi nyundu miyo jagoy musumal miseni, ka waco kwoŋ jamwon ni, “Ber.” To joridho gi musumal ŋey wokiri wonyali dhirok.

⁸To in, Isiraili, ŋeca paran, Yakobo, m'atieko yero, kodhi pa Abraham, mere paran,

⁹in m'akwanyin wok witum ma piny, t'alwoŋin wok i sonda mere mabor, k'awaco rin ni, “Ibedo ŋeca paran, atieko yerin, ak'obolin woko!”

¹⁰Ikir'ilwor, kole anitie kodin, ikir'ibwoki, kole abedo Were perin, alamedin meni, alakonyin, alamakin gi cingan maracuc ma turo lweny.

¹¹Ey, jono je ma jomako nge gi win, wickwot lamako jo t'ikengila jo, jono ma jolwenyo kodin, jolacale pa gim'ongoye kony to jotho.

¹²Wiladwaro jono ma jopiemo gi win, to wik'onwaŋ jo; jono ma jolweny gi win, jolacale gim'ongoye kony kicutho.

¹³Kole An, Rwoth Were mewin, amako cingi win maracuc, aŋat'awaco riwin ni, “Wikiri wilwor, alakonyo win.”

¹⁴Rwoth waco ni, “Makada nende ithin aka inyap rin, Isiraili, Ikir'ilwor, alakonyin. An, a Were maleŋ pa Isiraili, aŋat'abothin.

¹⁵Neni, alalokin ngolo ma muko cemo, mabith, manyen, aka ma nigi lake, wilamuko gote to wiŋinyo jo, to wiloko gote paka cuŋ.

¹⁶Wilapiedho jo to koyo kudho jo, aka asur lakedho jo. Nyaka to wifore i Rwoth, wilalimo dwoŋ i Ŋataleŋ pa Isiraili.

¹⁷Ka jocandi gi joma bu gimoro jorango pi, aka ongoye moro, aka lew jo othwo gi riyo, An Rwoth aladwoko jo, An Were pa Isiraili ak'ojwangi jo.

¹⁸Alayawo malawin womol i dier tendere ma lwanda, gi waŋ pi i dier milelin, alaloko thim kama pi opoŋ'iye, gi piny m'othwo waŋ pi.

¹⁹Alaketho yath sida i thim, kasia, yath mawuwa maŋwe kur kodi oliv, alaketho yath lwiyo i thim, yath ma timo sanduku kodi yath ma mbawo mere yom kanyacel.

²⁰Kenyo ji je jolaneno to joŋeyo, joje jowoteri paka gimadwoŋ to joniaŋ, ni cingi Rwoth am'otimo gime, Ŋataleŋ pa Isiraili am'ocweyo go.”

²¹Keli win banja mewin, Rwoth waco, keli win piem mewin, Kere pa Yakobo waco.

²²Weyi jokel jo, to jowaco riwan gima latimere. Jowaci riwan gigipiny macon, gima jobedo, ŋey wanyal paro kwoŋ jo, aka bende waŋey gima jotimo, kosa wotuci kamaler riwan gigipiny ma labino.

²³Jowotuci riwan gima labino yuwiye, ŋey wanyal ŋeyo ni wibedo werin, ma jonyalo timo bero, kosa timo teko, ŋey wanyal bedo gi lworo to wakirin.

²⁴Neni win, adieri, wikibedo gimoro, aka tic mewin ongoye gimoro swa, ŋata yero win obedo amien.

²⁵Atieko kitugila ŋatimoro wok yumalo, aka otieko bino, olwoŋi go wok yuwok ceŋ, go lalwoŋo nyingan. Go lanyono kerin paŋini pany, paka jacwey degi nyono lowo nyamasiga.

²⁶Ŋa m'owaco ginago kamaler wok i cakirok, ŋey wanyal ŋeyo, aka mafodi, ŋey wanyal waco ni, “Go otire?” Ongoye ŋatimoro m'owaco ginago kamaler, ongoye ŋat'otuco, ongoye ŋat'owinjo wac perin.

²⁷Awaco kutho marapena ri Zayon, aka amiyo Yerusalem jamikwenda ma siem.

²⁸To k'aneno, ongoye moro, i dier jome, ongoye jamic rieko, ma k'apenjo, miyo radwok.

²⁹Be, joje jobedo gima mieno jo, tic pajo ongoye kony, cal makicar pajo m'onyel obedo weyo nono.