Read dhopadhola Isaya 43 Bible Online

Isaya 43 - dhopadhola bible

Isaya 43

¹T'onyo pama Rwoth waco, ŋat'ocweyin, Awi Yakobo, ŋat'otimin, Awi Isiraili. Ikir'ilwor, kole atieko bothin atieko lwoŋin gi nyingin, ibedo aparan.

²K'iluwo wi pi, alabedo kodin, aka malawa, k'omwonyin; k'iluwo i mac, ik'owaŋ, aka mac m'ogaŋere k'onekin.

³Kole abedo Were perin, Ŋataleŋ pa Isiraili, jaboth perin. Amiyo Misir paka mic mareco perin, awilo Ethopiya gi Seba kodin.

⁴Rupiri ibedo gima diwelo ruwaŋan, aka iworin, amarin, amiyo dhano i kabedo perin, t'awilo ji gi kwo perin.

⁵Ikir'ilwor, kole anikodin, alakelo nyithindhin wok yuwok ceŋ, t'acoko win wok yupodho ceŋ.

⁶Alawaco ri yumalo ni, “Weyere gi jo.” Alawaco ri yupiny ni, “Ikir'igeŋ, keli wotan wok bor, gi nyithindho paran manyir wok i witum ma piny,

⁷kisi dhano je m'ilwoŋo gi nyingan, m'acweyo ri dwoŋ paran, m'atimo t'acweyo.”

⁸Wodhi woko jono ma waŋ gin otho, kucel jonigi waŋ gin, joma ithi gin otho, kucel jonigi ithi gin!

⁹Weyi nonin je jowocokere kanyacel, aka weyi ji jowocokere. Ŋa kwoŋ jo m'owodho gime kamaler, to nyutho wan gigipiny m'otimere con? Weyi jowokeli jokony pajo joworidhi ni jotire, aka weyi jowowinji to jowaco ni, “Obedo adieri.”

¹⁰Wibedo jokony paran, Rwoth waco, gi ŋeca paran m'atieko yero, ŋey winyal ŋeyo to wiyeyan to winiaŋ ni Abedo go. Ongoye were m'otelo bedo ran, aka ongoye moro je ma labino yuŋeyan.

¹¹An, abedo Rwoth, aka makiweno an, ongoye jaboth.

¹²Awodho kamaler, abotho t'atuco, munyo oyido ongoye were makicar i dier win, aka wibedo jokony paran Rwoth waco.

¹³Abedo Were, aka cil gi cil Abedo Go; ongoye ŋata nyalo botho wok i cingan; gim'atimo ongoye ŋata nyalo geŋo.

¹⁴Me apaka Rwoth waco, Jaboth perin, Ŋataleŋ pa Isiraili, Ro in aladhiro jolweny i Babilon, t'aturo woko nywenye je, aka koko pa Jokaldin lalokere kumo.

¹⁵An abedo Rwoth, Ŋataleŋ perin, Jacwec pa Isiraili, Kere perin.

¹⁶Me apaka Rwoth waco, go m'otimo royo i nam, m'oyweyo ger i pi ma meni,

¹⁷go ma fudho woko cawila gi punda, jolweny gi janek apondi, jopodho piny, jokinyal ay, ineko jo, ikudho jo paka kitambi tala.

¹⁸Ikir'ipoy gigipiny macon, kosa ipar kwoŋ gigipiny macene.

¹⁹Ere neni, atimo gimanyen; pama onyo tula, ikineni? Alatimo royo i thim, gi malawin iy'opalipat.

²⁰Ogwaŋe madudi jolamiyan dwoŋ, kibwe gin gi nyithindhi maya, rupiri amiyo pi i thim, malawin iy'opalipat, ma miyo ji paran m'ayero gir'amadha.

²¹Ji m'atimo ri an won, ŋey jowotuci pak paran.

²²Kucel wikilwoŋan, awi Yakobo; to wijok kodan, awi Isiraili!

²³Fodi wikikelo ran rombo mewin ma mic awaŋa, kosa wimiyan dwoŋ gi cowirok mewin. Fodi akijoko win gi kwayo mic, kosa alaco win gi kwayo buban.

²⁴Fodi wikikelo ran niaŋ mewin mamit gi pesa, kosa wiyeŋan gi bor ma cowirok mewin. To wituran gi reco mewin, wilacan gi reco mewin.

²⁵Kucel, Abedo Were ma cwako reco mewin ro bero paran won, aka Ak'opoy reco mewin.

²⁶Osa wi an, weyi wakidhi i kapido, keli banja mewin, ŋey wonyali ridho ni witire.

²⁷Kwari win marapena otimo reco, aka jopendo mewin jotimo reco kwoŋan.

²⁸Alakoco jotel ma Kabedo Maleŋ, aka alamiyo Yakobo rerok makicutho, t'aweyo iyeto Isiraili.