Read dhopadhola Isaya 46 Bible Online

Isaya 46 - dhopadhola bible

Isaya 46

¹Me gike pa werin ma Babilon! Bel gi Nebo m'oyido cango ilamo, gigipiny ma witiŋo me jopek, paka bieto ri ogwaŋe.

²Joluŋere, jokule kanyacel, jokinyal botho bieto, to jo wegi jokidho i twec.

³Winjan win, awi ot pa Yakobo, ji ma joboth je ma ot pa Isiraili, win m'atieko tiŋo wok i nywolirok, atiŋo win wok i ici.

⁴Kiri ka witi, abedo Were mewin, kiri ka witwi lwar, alatiŋo win. Atieko cweyo win, aka alabielo win, alatiŋo win t'abotho win.

⁵Nitie ŋata wilakipima an gi go? Rwoth penjo. Nitie ŋata rom kodan?

⁶Ji joyawo mugowa pesa pajo aka jokonjo zahabu, jopima feza i kilo. Jopangisa jandijo timo rijo were, aka jokule piny lamo.

⁷Jotiŋo gino to jojengo i goki jo, joketho i kabedo mere, aka cungo kenyo, kinyal core wok kama nitie i iye. Ka dhano okwayo, kinyal dwoko kwayo, kosa kinyal botho ŋato wok i teko.

⁸Poyi win gime, aka par win kwoŋe, kethi win i paro, win joreco.

⁹Poyi win gigipiny ma cango con, kole abedo Were, aka ongoye man, Abedo Were, aka ongoye ŋata cale kodan.

¹⁰Atuco gike wok i cakirok, aka wok cene atuco gima fodi k'otimere. Awaco ni, atoŋa paran latundo i kare, aka alatimo gim'amito.

¹¹Alwoŋo winyo ma camo wadi wok yuwok ceŋ, jacwo ma wok bor timo atoŋa paran. Atieko luwo, aka alamiyo wotimere, obedo atoŋa paran, aka alatimo.

¹²Winjan win, win jowictek, win ma wibor gi both:

¹³Akelo both paran cegin, ki nitie bor, aka both paran kilagalo; Alaketho both paran i Zayon, aka i Isiraili dwoŋ paran.