Read dhopadhola Isaya 47 Bible Online

Isaya 47 - dhopadhola bible

Isaya 47

¹Rwoth waco, Babilon lori piny wok i kom perin ma dhum, ibedi piny i fukefuke i lowo. Oyido icale nyako mambula, tindi madwoŋ ma kimaki, to, kilabedo ameno kendo.

²Kwany win tele ma rego, aka wicaki rego ŋano. Luny win nangin ma waŋ win, lunyere win, dol win nangin ma tiendi win, wiluw i malawin.

³Kinyoro mewin ibino yawo, t'ineno wickwot mewin. Alaculo kwor kwoŋ win, aka ongoye ŋat'alaweyo.

⁴Jaboth mawan, Rwoth pa lwak jolweny, meno nyingi go, go obedo Ŋataleŋ pa Isiraili.

⁵Rwoth waco ri Babilon, bedi liŋ aka kadhi i mudho, Awi nyar Jokaldin, kilalwoŋin ni nyamicala ma kerin kendo.

⁶Oyido amako nge gi ji paran, t'akoco alunja paran, aketho jo i cingin, aka ikinyutho jo ŋono, kiri jom'oti je iketho kwoŋ jo okol mapek ma kiwacere.

⁷Iwaco ni, “Alabedo nyamicala cil gi cil.” Ikiketho gime i cunyin, kosa ikiparo ni latundo i gike.

⁸Onyo riameno winji gime, in m'imaro gigipiny ma del, in m'ibedo kam'okwe, m'iwaco i cunyin ni, “An ago, ongoye ŋata cale kodan, akilabedo paka citho, kosa nyithindho paran jokilatho.”

⁹To gigipiny ario me lapodho kwoŋin, i hongo macek, i ndelo acel, nyithindho perin jolatho, aka ilabedo citho m'ongoye keŋ, makada nende inoor meni ma thieth gi meni mathoth ma yido perin.

¹⁰Iwinjo m'okwe i kidakana perin, t'iwaco ni, ongoye ŋata nenan. Rieko perin gi ŋeyo perin, orweyin woko, t'iwaco i cunyin ni, obedo an won kende, aka ongoye ŋatiman kendo.

¹¹To gimarac lapodho kwoŋin, m'ikonyal kwanyo woko. Teko lapodho kwoŋin, m'ikila nyalo ciro, rerok lapodho kwoŋin abwap, m'ikiŋeyo.

¹²Cungi m'ocwiny i yido perin, gi jothieth perin kweth, m'itieko oyo kwok wok i soye perin, kono onyali konyin, kono onyali bwoko jokwor perin.

¹³Ingoye gi meni makada nende inigi jomic rieko; weyi jobin aka jowobothin, jono ma jopoko polo, ma jokaŋasa micalin, ma kisi ka dwe opor, jowaco amien ma latimere rin.

¹⁴Neni, jolacale kanja, aka mac lareyo jo woko! Jokinyal bothirok, kwoŋ meni pa mac. K'obedo cuk ma dhano nyalo oyo, kosa mac m'inyalo bedo cegin gine.

¹⁵Meno a nger jono m'itieko oyo kwok gi jo, m'itimo gi jo mitan wok i soye perin. Jolera kicar, kisi dhano i yo pere, aka ongoye ŋat'obothi win.